第21集 - Christal 講解 Learn to Play Program - 想像與象徵遊戲
Learn to Play Program 是 Dr. Karen Stagnitti 為⼀至⼗歲小孩的評估和治療方案。
科學研究證明，想像與象徵遊戲有效幫助腦部各區發展。包括: ⼼智理論(THEORY OF MIND)、社 交能力、創意、情緒調節能力、分析能力、和解決問題技巧。
遊戲是⼀項極為複雜的行為，卻也是最容易被⽗母忽略和誤解。 當中想像與象徵遊戲 (Symbolic or Imaginary Play) 最能讓孩⼦理解別人的觀點， 學會看透事物的本質，從他們的遊玩中顯示更清晰的想法和意義。
治療師會用想像與象徵遊戲檢查表 (PRETEND PLAY ENJOYMENT DEVELOPMENTAL CHECKLIST (PPE-DC) 為小孩做遊戲評估。包括:
- 遊戲劇本
- 動作連貫性
- 玩具的象徵性
- 洋娃娃/泰迪熊
- 角色扮演
- 社交能⼒
第一次評估報告瞭解孩⼦的遊戲能⼒年齡後， 治療師會與家⻑擬定治療⽬標，然後治療師會 為孩⼦設計和安排適合他們的玩具和遊戲。
接下來每周一次的⾒面便會朝着治療⽬標進行。 ⼤約6至8週便可開始看到轉變，而自閉症的孩子大約需要22到24周為一個療程。
遊戲是⼩孩實現自我，建⽴快樂的重要元素。因此⼩孩在遊戲中是否能玩得開心也是此治療重要元素。
支持廣東話遊戲治療分享，請 Christal 喝咖啡:
https://www.buymeacoffee.com/christallau
廣東話遊戲治療分享由 Christal Lau 主持。
Christal 主修心理學，犯罪學碩士，遊戲治療碩士，為自閉症孩子作出早期干預。
這個 podcast 會由 Christal 分享與小朋友治療上的趣事，適合所有家長和對遊戲治療有興趣的朋友收聽。
Facebook: https://www.facebook.com/PlayTherapyInCantonese
Instagram: https://instagram.com/playtherapyincantonese
第21集廣東話遊戲治療分享我係Christal。
今集想同大家講解一個好Powerful好有效果的遊戲治療 - Learn To Play。 呢個program係澳洲Dr. Karen Stagnitti 用13年研發出嚟。咁我喺墨爾本嘅 Deakin University 大學見過 Dr. Stagnitti ，佢同我講這個program喺其他歐洲國家比如法國同埋德國叫做 Symbolic and Imaginative Play，我經過Dr. Stagnitti 同意中文會翻譯為想像與象徵遊戲。為咗方便講解我係呢一集就會簡化叫佢做象徵遊戲。
首先好多人都未必知道遊戲治療大約係會做乜嘢，點解會有唔同嘅program。我通常會用一個比喻同家長解釋，遊戲治療就好似我哋去睇牙醫咁，牙醫會有好多唔同嘅服務，會幫病人補牙、整牙橋、種牙等等視乎病人需要。呢一個Learn to Play Program 就好似洗牙咁，係一種早期干預，適合所有小朋友，而且當然係特別適合一啲有特殊需要嘅小朋友。趁小朋友腦部仲係急速發育緊嘅時候，捉緊機會教他們一些需要的技能。
Dr stagnitti 喺70年代已經係一位負責兒童早期干預職業治療師。佢有講過咁多年嘅經驗接觸小朋友佢知道、睇得到小朋友遊戲嘅能力係一個好重要嘅指標，比如話一個小朋友語言能力如果停滯喺兩歲半，佢嘅遊戲能力都會係hand in hand停滯喺差唔多嘅Level，調返轉當佢遊戲能力有進步嘅時候佢語言能力亦都會有所提升。
遊戲治療雖然算係一個比較新嘅專業，但係咁多年以來佢係經過唔同嘅科學理論同埋研究去成為而家咁有效嘅其中一種治療方法。講返喺70年代時其實冇一個準則去評估小朋友嘅遊戲能力，更加難以去定斷要點樣幫助小朋友嘅方法。所以Dr Stagnitti 研發出呢一套象徵遊戲去幫助家長同埋治療師去理解小朋友嘅Level，從而幫助小朋友嘅發展。
我喺呢一度唔打算同大家再詳細解釋遊戲係有幾咁重要，因為聽得呢個節目嘅聽眾我相信對小朋友嘅腦部發展會有基本嘅認識。業內人士，譬如老師、職業治療師、語言治療師、同埋心理學家都會明白，佢哋要教小朋友一個新嘅技能通常用遊戲會係最有效嘅方法。
首先，大家知道遊戲分好多種，譬如積木或者Lego係 functional play 功能遊戲，亦都可以訓練小肌肉，去公園玩可以訓練大小肌肉， broad game 棋盤遊戲可以幫助訓練社交同合作能力。而大家可能冇諗過嘅 Pretend Play 想像遊戲其實係眾多遊戲之中最高階、最難玩、亦都係對腦部發育接觸層面最廣嘅遊戲。接觸最廣嘅意思係，呢個遊戲可以提升語言能力、社交能力、提高認知能力、解決問題嘅能力、同別人溝通的方法。咁喺呢度我唔想太長氣，因為呢個program其實係有啲複雜，遊戲技巧亦都分得好仔細，我會喺呢度講其中一個技巧，其餘嘅有興趣嘅我喺show notes嗰度擺詳細資料。
咁而家有啲家長就會講，玩咋嘛，我個仔識！佢屋企有二百幾架車成日都鍾意玩排隊。但係呢個唔係想像遊戲，事實上我唔認為呢一種玩會有特別嘅益處。我都有好幾次clients’爸爸會同我講，我個仔好叻㗎，冇人教過佢就識得搵電池嘅掣喺邊，嗱我冇話唔叻，但係呢個幫唔到小朋友嘅社交能力。
喺呢度我分享少少例子等大家對唔同年紀層嘅遊戲能力有個概念，我諗做開幼教嘅老師會比較清楚，一個兩歲半左右嘅小朋友佢哋可能會識嘅方法拎住一個公仔，用玩具BB車，推個公仔出去玩，餵個公仔飲奶或者食嘢，跟住返屋企煮飯，有啲男仔會扮爸爸返工。基本上就係扮演佢係屋企見到爹哋媽咪一日嘅流程。咁男仔係呢個年紀可能就會鍾意用火車喺沙池嗰度玩搬沙，扮建築扮起樓。如果喺兩歲半三歲呢個年紀玩嘅方法仲係將玩具拋高，撞車，整散晒，呢個就係一個指標小朋友唔識得玩，家長嘅就可以注意考慮搵呢個想像遊戲 program教小朋友。
點解教小朋友玩咁重要？
關於呢個問題我鍾意用另外一個例子同家長解釋，大家都會聽過喺國外好多小朋友十四、五歲就會去麥當勞打工，有時我哋會好驚訝有啲小朋友佢哋好生性懂事，話頭醒尾，知道主管嘅要求。但係另外有啲小朋友唔好話出去打工，就算平時同朋友互動都會比朋友排擠，有啲甚是俾人話佢自私唔識諗人感受。咁而家我哋就來推論一下，一個十四五歲嘅小朋友，可以係職場上咁話頭醒尾，有呢個結論向下推落去佢10歲嘅時候應該就好識得同身邊嘅同學相處，五歲嘅時候應該會睇到呢個小朋友有基本嘅技巧去同其他小朋友玩。
呢一樣嘢就係象徵遊戲入面六個play skill 其中一項可以幫助提升嘅嘢，呢個play skill 就係叫做 Role Play （角色扮演）。
我個人經驗之中呢一個skill其實係最難，但係如果用呢個象徵遊戲program去逐步逐步教到小朋友，對佢嘅社交能力真係會有好大嘅益處。
我喺呢度約略講吓呢一個角色扮演每一步大約係點；由BB出世半歲到一歲左右會去學父母擘大個口，或者笑，呢個其實係其中一個原因點解我哋餵BB嘅時候我哋自己都會擘大個口就係想示範俾小朋友睇應該點樣做。去到歲半或者兩歲就會扮屋企人去餵公仔（比如Teddy bear)食嘢，男仔就可能會用車或者火車 tu tu 咁樣向前向後咁樣行而唔係拎住兩架車互撞。再大少少兩歲之後通常就會開始扮另外一個角色，比如扮電視上面嘅Peppa pig豬叫。兩歲半之後就會短暫扮一個平時少啲見嘅角色比如醫生或消防員。三歲之後就可以掉轉角色，比如賣雪糕然後掉轉扮客人，三歲半之後就可以扮得比較流暢同純熟，去到五歲小朋友就最好可以成日保持飾演一個角色，比如成日都係做緊蜘蛛俠。
點解角色扮演咁難做？
大家可以幻想一下，一個小朋友要做到我頭先講每一個Step嘅步驟，首先佢要有能力觀察入微，平時會留意到身邊嘅事物，留意每個人嘅角色同責任會有唔同。例如有啲小朋友會將毛公仔一行咁樣擺喺面前，然後自己扮老師。呢個情況佢會知道老師嘅責任係教書，小朋友嘅責任係坐定定聽書。咁喺呢度問題就嚟啦，如果一個有自閉症嘅小朋友，本來佢哋嘅theory of mind （心智理論）已經係比較弱，即係話佢理解周遭啲人嘅心理狀況呢個能力比較弱，咁通過角色扮演呢一個遊戲技巧去教呢類嘅小朋友甚至乎啟發佢，就會係一個好有效嘅方法。
就好似我哋學乘數表咁，有啲小朋友好快就明乘數表嘅理論。但係有啲唔識嘅就真係會覺得好痛苦，利用象徵遊戲呢個方法其實就係好似學乘數表，有困難嘅小朋友，我哋會用最簡單嘅方法比喻用四個蘋果排列出嚟俾佢見到2×2嘅視覺效果係點樣，而唔係當佢長大，到家長先發覺原來小朋友唔識得微積分咁當然啦佢連乘數表嘅根基都未有。就好似有啲小朋友長大咗嘅社交能力影響到工作，就係因為佢細個嘅時候未打好個基礎。
其實六個技能之中，我喺呢度只是約略講其中一種角色扮演每個Step都scaffolding 一層層慢慢上分得好細，但係其實有佢嘅原因，就好似我哋爬樓梯咁樣逐步逐步上去先至可以有信心可以穩健咁樣去發展呢一種認知能力。我其中一個case係同一個六歲嘅小朋友玩Cafe遊戲。咁當時佢嘅角色扮演已經去到四歲半嘅Level，開始嘅時候我會示範俾佢睇點樣做一個waitress，佢做客人。然後我哋會交換角色。你可以想像從中佢就留意我同佢會有唔同嘅需要，要有足夠嘅社交技巧去聽我落order嘅指令，要有安排技巧，鋪排下一步點樣做比如要收錢等等。
象徵遊戲提升左play skill 即係遊戲技巧之後，唔單止可以幫到小朋友嘅語言發展、社交能力、同埋佢嘅組織能力同埋自制能力（情緒控制），亦都可以幫助提升佢嘅創造力同埋認知行為。
如果想參與象徵遊戲，首先家長要有心理準備呢一個係一個中長線嘅program。當然每個小朋友進步嘅速度都會好唔同，但係一開始我都係會首先同家長做一個資訊，第二個session再同小朋友做一個遊戲評估 PPE-DC
(Pretend Play Enjoyment Development Checklist)，評估中見到小朋友有邊兩三個遊戲技巧係比較低嘅就會由嗰度開始集中提升返嗰部份嘅技能。比如話一個五歲嘅小朋友如果係角色扮演中只係去到兩歲嘅Level，咁我就會有兩歲嘅部份開始覺，而唔會一開始教佢五歲嘅技能。
我明白唔係每個城市都會有想像與象徵遊戲嘅治療師，比如喺香港我錄音機呢一刻搵個係冇嘅。如果家長都好想用呢個方法幫助小朋友可以點樣做呢，所以下一集我會想集中講家長同小朋友玩象徵遊戲可以會有乜嘢技巧、有咩需要注意。
小朋友有進步，讚佢哋之餘記得要讚下自己，佢哋叻左你做家長有好大功勞㗎！下一集再傾拜拜。