第22集廣東話遊戲治療分享我係Christal。
今集會繼續承接返上一集解釋想像與象徵遊戲六個唔同嘅遊戲技能。
上一集我簡約咁樣解釋咗角色扮演係咩一回事。今集我想繼續簡單咁樣解釋另外五個有效幫助小朋友腦部發展嘅嘅play skills。
我想講解一下點解我會喺呢度同大家解釋learn to play program 。遊戲治療入面呢個項目其實係針對一啲唔識得玩嘅小朋友,爭取佢地腦部仲係急速發育緊嘅時候去reach full potential 幫佢哋達致最好嘅腦部發展。
咁當然如果喺你個地區有一個learn to play 遊戲治療師就梗係最好啦,因為我哋係受過訓練去專注睇唔同小朋友需要從而幫助佢哋。我想喺廣東話遊戲治療podcast呢度解釋係因為我知道好多家長住嘅地區冇呢一種服務,但係起碼大家可以有個概念知道有咩遊戲喺唔同嘅年紀層係可以教小朋友玩,比如話如果你個小朋友係四五歲,但係你聽到佢嘅遊戲技能只係得大約兩歲,咁你就會係由兩歲半嘅遊戲技能開始教佢玩等佢慢慢build up上去。其實learn to play program係有比家長同埋老師嘅online workshop,不過只係有英文,我會喺show note嗰度擺低條link俾大家有興趣嘅去睇吓。
首先大家都明白玩係好重要,有啲家長會話我個仔有玩啦,佢玩車拎住iPad佢都係玩緊。我唔反對嗰啲係玩,但係唔係我今日講對腦部發展更有效嘅玩法。事實上象徵遊戲我係覺得亞洲人本來都好少咁樣做,呢個應該係文化差異嘅問題,亞洲人係一個好崇尚勤力讀書勤力學習嘅民族,認為勤有功戲無益。所以如果你問我,亞洲人係呢一部份嘅發展係缺乏嘅。
我以下落嚟講嘅遊戲技巧家長要捉實兩個重點,當然每一個遊戲技巧都有佢唔同嘅原因同埋背後有大量研究support嘅原理。但係如果冇咗呢兩個重點就算逼到小朋友玩到都未必會work。第一就係佢哋玩得開心,佢要有enjoyment。我係試過有家長因為好心急佢自己都好焦慮,返屋企陪個小朋友玩嘅時候佢直情好似用迫嘅方法希望調教個小朋友做返嗰啲動作出嚟,其實咁樣係非常之唔work,而且會產生另外一啲問題比如令到小朋友更加焦慮。第二重點就係玩嘅時候我一定要個小朋友係自發玩出嚟先至當係Master到嘅play skill。
第一個就係遊戲劇本play scripts。上集有俾個大家一個例子,一個兩歲半左右嘅小朋友通常可以玩到屋企見到嘅嘢,洋娃娃喂佢哋飲奶食嘢再擺喺玩具BB車帶佢出去散步然後拎返屋企氹瞓覺。呢一系列嘅動作就等於佢玩返自己屋企做緊嘅嘢。咁頭先提過啦如果一個小朋友已經去到四五歲但係從來都冇玩過平時屋企發生嘅嘢,咁就要由呢個基礎開始教起。
通常一個Neuro typical小朋友一個普通嘅小朋友可以好快學識,然後自己玩返出嚟。有自閉症或者其他需要嘅小朋友,depends on 佢嚴重嘅程度,可能會需要多啲時間。有智能障礙嘅小朋友就需要更多sessions。喺呢度我想指出一點嘅係,好多時有小朋友呢一部份學咗好耐都唔識,佢哋嘅家長就會覺得,係我個仔對啲咁簡單嘅嘢冇興趣,而唔係佢唔識。我明白家長對小朋友嘅期望係大嘅,尤其是有啲家長覺得個小朋友已經背到三字經,又或者識計數,點會需要玩呢樣嘢。喺呢度大家可以想像一下,一個有自閉症嘅小朋友平時屋企人係點樣照顧佢,可能會安排的照顧得非常之好起身刷牙洗面換衫上車返學,都照顧得無微不至。但係呢類小朋友其實唔知自己做緊乜嘢,家長會諗到如果有一日冇人返學之前照顧佢,某一啲小朋友可能完全唔會知自己有咩需要處理。呢個係小朋友唔能夠將平日屋企每一日係自己身上周遭發生緊嘅事情玩出嚟嘅原因。你諗吓一個兩歲半嘅小朋友能夠用一個玩具BB餵奶為食嘢氹佢瞓覺,佢個腦首先要明白平時媽咪喺屋企咁樣做係有連貫性係有意義嘅,咁小朋友先至可以process番出嚟。通常自閉症嘅小朋友唔識得玩呢個基本嘅遊戲,其實係代表佢連平時每日發生喺自己身上嘅事佢個腦喺認知方面未連繫到。當我哋成日都話想幫有自閉症嘅小朋友帶返落嚟地球,除咗喺佢哋對話之中上有眼神接觸想佢同我哋有寶貴一刻嘅聯繫之外,用遊戲就可以幫佢register連繫返平日生活上發生緊嘅事。用最基礎嘅方法令小朋友開始明白周遭發生緊嘅事同佢自身嘅連繫。如果一個兩三歲嘅小朋友對周遭環境發生嘅嘢連繫唔到,佢繼續長大就會好confused對世界感覺到更加困惑。
喺遊戲劇本入邊,我哋會希望小朋友兩歲半以上就會玩一啲平時少啲發生嘅事,比如睇醫生、剪頭髮。去到三歲就會多啲幻想嘅嘢fantasy play,比如會有精靈或者怪獸。所以有時小朋友夜晚會怕黑會驚有鬼怪,佢係有想像力。咁去到四歲半五歲就可以玩任何一樣野而佢哋會記得嗰個故事係點樣連續玩幾日都OK嘅,比如我試過有一個五歲嘅小朋友佢會帶我遊覽佢間房,呢邊係日本呀(指住天花板)嗰度呢好多忍者跳來跳去,呢邊呢係海底世界啲魚見到啲忍者,學佢哋玩飛鏢。
第二個play skill遊戲連貫性 。一歲以下就會重複動作,例如喺沙池嗰度用一支棍重複咁樣敲打鐵罐。或者用一堆玩具車排成一條直線都係屬於一歲以下嘅玩法。一歲至歲半就會扮拎住個杯飲嘢或者餵自己食嘢,去到兩歲就會有多啲動作比如推架鏟泥車然後裝滿唔同嘅積木,再推去另外一個地方扮運貨。去三歲半左右就可以計劃諗住佢個遊戲係點玩,所以去到三歲半到五歲果段時間我同小朋友玩地球探索,咁唔同嘅月球或者外星人會慢慢加上去嘅,又或者恐龍動物園,又或者女仔可能會鍾意自己變成一個仙子,然後去唔同嘅世界探索。跟住我就會教佢哋喺遊戲前計劃個故事會係點樣。比如有時我會嘗試用一張紙用圖畫同小朋友一齊計劃佢嘅故事,跟住先至再玩返出嚟。
第三個 object substitution 象徵玩具,咁呢個其實同小朋友將來解決問題嘅能力、靈活度、同埋創造力都有關係嘅。比如大約兩歲嘅小朋友會用一塊積木扮爹哋媽咪講電話,兩歲半就會可以用同一件物件就可以扮幾個唔同嘅嘢,比如本來一個紙盒仔用嚟做枱比BB食飯,調轉頭又可以用嚟做車,又或者跟住用來扮做煮食爐。去到四歲左右就可以冇嗰樣嘢份友,比如拎住空氣扮倒水,甚至乎imaginary friend 即係幻想出嚟嘅朋友都會係呢個年紀發生。所以如果家長見到小朋友會有幻想出嚟嘅朋友,其實係一個好正常不過嘅事唔需要太擔心。
第四個 play skill 洋娃娃/泰迪熊 ,如果小朋友唔鍾意玩呢個都冇問題嘅,有啲男仔可能會用恐龍,或者鯊魚公仔都可以。玩公仔呢部份可以對照返第一個遊戲能力play scripts。小朋友一歲至歲半可能會將個公仔擺正坐好,一歲半到兩歲可能會扮為佢哋食嘢,兩歲之後就可以玩到個公仔好似有生命咁。去到大約三歲半個公仔就可能會有多啲唔同嘅性格,比如可能有小朋友會將幾個唔同嘅公仔牌喺前邊自己扮係老師,然後會話唔同嘅公仔有啲可能係曳啲有啲可能白色嗰隻兔仔好乖有啲可能特別鍾意食朱古力。有少少似佢會知道班上面唔同嘅小朋友會有唔同嘅性格咁樣。
第五個遊戲能力就係上一集講過嘅角色扮演 role play。歲半至兩歲可能會扮動物比如牛仔豬仔叫,兩歲半左右就會短暫咁樣扮一個角色,比如短暫咁扮賣雪糕,呢個應該係會同佢周遭接觸嘅事物有關,可能佢會成日經過麵包舖咁佢屋企就可能會扮麵包舖入邊嗰個姐姐賣麵包。三歲後就可能一人分飾幾角,比如自己扮去買麥當勞,然後企另外一邊又扮麥當勞打工嘅侍應。去到四五歲就有可能可以扮一個角色扮演足全日,所以小朋友如果想着一件蜘蛛俠嘅衫跟住佢做足全日蜘蛛俠其實係一件好事嚟㗎。
其實角色扮演係一個我自己好有興趣繼續做研究嘅topic,因為我自己做好多講中文嘅Clients,發覺我好少會有一個client識得屋企又玩角色扮演,甚至乎佢哋嘅父母細個嘅時候都冇做過呢樣野。關於呢樣嘢我有同其他遊戲治療師傾過計,佢哋都留意到我哋亞洲人係比較少做呢個動作。甚至乎我試過有家長會問我,教佢哋玩角色扮演會唔會令佢哋精神分裂又或者玩埋啲咁嘅嘢究竟有咩用。我喺呢度話俾大家聽角色扮演喺象徵遊戲之中最難一樣嘢,亦都係對將來嘅認知能力發展有影響。如果着實真係做唔到小朋友會有咩影響呢,其實另外兩個play skills都可以support角色扮演,只不過始終都唔及角色扮演咁有效。
最後一項遊戲能力就係社交能力。12個月之前嘅BB通常你會希望佢有眼神接觸,觀望照顧者嘅眼同埋口同埋會扮照顧者做嘅嘢。比如扮講嘢或者我哋為佢哋食嘢嘅時候抹大個口,就係想小朋友扮我哋抹大個口。去到一歲半或者兩歲就會開始想問人攞佢需要嘅玩具,兩歲半左右就會鍾意喺人哋旁邊平衡一齊玩。之後就會開始同佢嘅玩伴遊一個溝通啦,去到四歲以後呢就會開始去商量玩乜嘢,甚至乎會開始同人嗌交因為會發覺自己同人哋嘅要求會有唔同,呢個其實一個好正常嘅現象。
六種遊戲技能我只能夠好約略咁樣解釋俾大家聽。我重申一下,家長如果留意到自己嘅小朋友可能去到某一個年紀原來都冇相應技能,千祈唔好太過焦慮,因為你嘅焦慮只會為小朋友帶嚟更加負面嘅影響,我建議如果可以嘅搵一個遊戲治療師幫手,因為其實所有治療師嘅角色都係去陪伴家長,一齊合作去幫個小朋友比最好嘅佢。又或者如果冇呢個可能嘅試吓我頭先講 learn to play online workshop 學下點樣同個小朋友玩,正面咁樣去學習點樣幫助自己嘅小朋友,絕對會比起等佢大啲睇吓會唔會到時會好啲呢一個諗法有幫助。
今集就講到呢度
小朋友有進步,讚佢哋之餘記得要讚下自己,佢哋叻左你做家長有好大功勞㗎!下一集再傾拜拜。