Avea le Atua ma ou Tamā (Let God be your Father)

OPEN HEAVENS

MATALA LE LAGI MO LE ASO LULU 24 TESEMA 2025

(tusia e Pastor EA Adeboye)

Manatu Autu: Avea le Atua ma ou Tamā (Let God be your Father)

Tauloto Tusi Paia: 2 Korinito 6:18 “E fai fo‘i a‘u mo ‘outou Tamā, e fai fo‘i ‘outou mo‘u atali‘i ma o‘u afafine, ‘ua fetalai mai ai le Ali‘i e ona le malosi uma lava.”

‭‭

Faitauga - Tusi Paia: Kalatia 4:4-7

I le Mataio 15:21-28, na fetalai Iesu, ‘e lē lafoina meaai a tamaiti i ulī’. O lona uiga o le tagata, a lē o ia o se atalii poo le afafine o le Atua, o ia o se ulī. O fanau e iai o latou tamā, a’o ulī e iai o latou matai. E mafai e fanau ona o atu i o latou tamā i soo se taimi e fesili iai i se mea pe talosaga atu foi i se mea e manao ai, ae e lē mafai e ulī ona faia lea tulaga. O le tamaitiiti e mafai ona aai faatasi ma lona tamā i luga o le laulau, a’o le ulī e masani ona nofo i lalo o le laulau e ‘ai ini momoi mea e pauu mai le laulau. O nei ulī, e fiaaai pe afai e leai ni momoi mea e pauū mai le laulau. Afai e lei tuuina atu lou ola ia Iesu, e lē o oe o se atalii poo se afafine o le Atua, ma o le taimi tonu lelei lenei e te liliu ai ia te ia ma faataga o ia e avea ma ou tamā. 

E tele naua suafa o le Atua, o Ia o le Tupu o Tupu ma le Alii o Alii ( Faaaliga 19:16)  o Le e ona le malosi uma lava (Iopu 23:16), o le amataga ma le gata‘aga, o le muamua ma le mulimuli (Fa‘aaliga‬ ‭22‬:‭13‬). E ui i ona suafa uma, ina ua a’oa’o Iesu i le ala e tatou te tatalo ai i le Luka 11:1-2, na ia fetalai e tatau ona tatou amata, ‘Lo matou Tamā’. O le suafa e fiafia le Atua e tatou te valaau ai ia te ia o le Tamā. I lona tulaga Tamā, o le Atua o lo tatou punaoa, e na te saunia mea uma, o Ia o lo tatou fesoasoani sili. E leai se tamā alofa e vaai atu i lana fanau o puapuaga, ae tuu lava i latou e puapuaga pea. 

Ao ou tamaitiiti, e masani ona ou mulimuli i lo’u tamā i lana faatoaga. E ma te sopoia lava le vaitafe pe a ma foi mai, ma e iai taimi e pa ai le vai. A tupu lea tulaga, e masani ona tafiesea ai le tamai auala laupapa e matou te savavali ai i leisi itu. E iai se taimi na tupu ai lea tulaga, ona tago lea o lou tamā sii au ma amo i luga o ona tauau i leisi itu o le vai aua o loo ou laitiiti lava ou te ono malemo i le tafe o le vai. Ao ma savavali i le isi itu o le vaitafe, sa ou taaloalo i le vai aua sa ou nofo i ona tauau. Afai e mafai e se tamā i lalo nei ona faia mea uma e puipuia ai lana fanau, e lē sili ea mea e faia e lo tatou Tamā oi le lagi?

Le au pele e, afai o oe o se atalii poo se afafine o le Atua ae o loo e ui ini luitau o tofotofoina ai lou faatuatua, taofi mau pea i le Atua, o ia o le Tama alofa, e mautinoa e na te foa‘iina atu ‘iā te ‘outou le i‘uga e i ai le fa‘amoemoe (Ieremia 29:11). Peitai afai e te lei tuuina atu lou ola ia te Ia ae o loo e fia iloa lona alofa faapitoa ma lana tausiga, talia loa lana valaau mai e avea oe ma sona afafine poo sona atalii i le asō, ona e fiafia lea i lona filemu i vaega uma o lou olaga, i le suafa o Iesu, Amene. 

‭‭