Le toe iai le fememeai (No more confusion)

OPEN HEAVENS

MATALA LE LAGI MO LE ASO GAFUA 16 FEPUARI 2026

(tusia e Pastor EA Adeboye)

Manatu Autu: Le toe iai le fememeai (No more confusion)

Tauloto Tusi Paia: Luka 15:17 “Ona atamai ai lea o ia, ‘ua fa‘apea ane, ‘E lē to‘atele ‘ea o ‘au‘auna a lo‘u tamā ‘ua faula‘i a latou areto ‘ua totoe; a o a‘u, ‘ou te matelaina.”

Faitauga - Tusi Paia: Tanielu 4:28-37

O le maua i le fememeai i taimi uma, o lona uiga ua saisaitia le mafaufau. O se faataitaiga o le fememeai o se tamaitiiti aoga e faigata ona malamalama i mea o aoaoina ai o ia tusa poo le a le umi o fai meaaoga. O nisi tamaiti aoga e malamalama i le taimi e aoaoina ai e le faiaoga, peitai a fesili atu pe suesue lo latou malamalama e ala i suega mo se faataitaiga, e latou te lē manatua se mea. O leisi ituaiga fememeai o se tagata e leiloa fai ni faaiuga i mea e tatau ona faia. 

I le faitauga mai le Tusi Paia i le asō, ua lēai se malamalama i le tupu o Nepukanesa, ma ua tulia ese mai tagata. Ina ua mavae le fitu tausaga, ua faaalia le alofa mutimutivale o le Atua ia te ia ona toe atamai ai lea(Tanielu 4:34). Na aveesea foi le malamalama mai le atalii faamaumau oa mo se taimi, ma e leai se faaiuga poto na ia faia seia toe maua e ia le atamai ( Luka 15:11-32). A osofaia e le tiapolo se tagata i le fememeai, e ono faapea lea tagata o le mea lelei o se mea leaga, ao le mea leaga ua manatu e lelei. 

Sa iai se tamaitiiti e polofesa ona matua, peitai e lē pasi ana suega ma e tele ina ulivaa i le vasega. Na faia e ona matua mea uma e fesoasoani ai i ana meaaoga. Sa saunia foi ni faiaoga e fesoasoani pe a uma le aoga ae lē pasi lava. Ina ua mavae sina taimi ona la aumaia lea ia te a’u, ona afio mai lea o le Atua Silisili Ese. I ana suega na sosoo ane ai, na pasi maualuga le tamaitititi ma ua sili i le vasega. Na matua ofo lana faiaoga aua i le taimi muamua, tusa pe ave iai tali o suega e kopi ai, e sese lava ona ia kopiina tali, ma e le pasi lava. Na manatu loa le faiaoga o le a toe faasue i le suega, ae na sili atu lona maka i le su’e faalua. Mo soo se tagata o loo faitau pe faalogo i lenei faamalosiau ae o loo saisaitia lona mafaufau, ou te tatalo ia paū atu le afi o le Atua ma faasaoloto oe mai le fememeai, i le suafa o Iesu. 

A osofai ese temoni se tagata i le fememeai, e faigofie ona sesē le ala o le a ui ai. O le a lē lelei mea e faia ma oo ina lē manuia ona o galuega a temoni. Ou te tatalo mo oe i le asō, o soo se vaega o lo’o osofaia ai oe e temoni, e pei o le lē mautonu ma tele ina nunumi le mafaufau, o le a e maua le iupeli, le faasaolotoga. Ou te folafola atu o le a e savali pea i le malamalama ma le atamai i le suafa o Iesu. 

Tatalo

Tamā, faamolemole foai mai ia te au le malosi e faia ai faaiuga poto i taimi uma, i le suafa o Iesu, Amene.