Iupeli (Jubilee)

OPEN HEAVENS

MATALA LE LAGI MO LE ASO SA 17 ME 2026

(tusia e Pastor EA Adeboye)

Manatu Autu: Iupeli (Jubilee)

Tauloto Tusi Paia: Teuteronome 30:3  “ona fa‘aa‘e lea e le ALI‘I lou Atua o lau tāfeaga, ma alofa atu ‘iā te oe, ma toe fa‘apotopoto mai ‘iā te oe a‘i nu‘u uma ‘ua fa‘ata‘ape‘apeina ai oe e le ALI‘I lou Atua.”

Faitauga - Tusi Paia: Levitiko 25:25-28

O le Iupeli, o lona uiga o le faasaolotoga, faamalologa, poo le toefuataina. I le tusi o Levitiko 25:8-10; na poloaiina e le Atua le fanauga Isaraelu ia tausisia le Iupeli I le atoaga o le limagafulu tausaga ta’itasi. A o’o mai le tausaga o le Iupeli, so’ose tasi o saisaitia po’o se pologa, ia faasaoloto. Tusa pe afai o se uso ua saisaitia ona o lona faaletonu poo le sesē, e fa’asa’oloto lava ia. E le gata i lea, so’ose tasi e i ai se aitalafu o le a faamagalo i le tausaga o le Iupeli.

O loo tatou talanoa faatatau i le Iupeli i le asō, auā e finagalo le Atua e fa’asa’oloto ona tagata mai saisaitiaga a Satani. E finagalo ia savavali ona tagata i le sa’olotoga i so’ose itu o latou soifuaga. O le sa’olotoga o le alu ese atoatoa mai so’ose olaga pologa. So’ose tagata e taofiofia se uso i le pologa pe a ua folafola e le Atua le Iupeli, o le a faasagatau i le Atua, ma ou te le’i vaai i se isi ua faasagatau i le Atua ma manumalō. 

E lē faapei o Isaraelu e faamamalu ai le Iupeli pe a atoa le ta’i limasefulu tausaga i taimi o le feagaiga tuai, afai o i ai Iesu i lou olaga, e mafai ona e ola i le Iupeli i aso uma. Na afio mai Iesu e lavea’i, fa’asa’oloto ma fa’afo’i i tatou i le Atua ma, o so’ose tasi e sau ia te ia o le a ia maua le Iupeli atoatoa. Iā Keriso, ua folafola e le Atua le Iupeli mo oe ma lou ‘au aiga, ma so’ose malosi o le pouliuli e mana’o e taofi oe ma so’osemea faatatau ia te oe i le pologa, o le a faaumatia e le afi ma’ama’ai i le suafa o Iesu. A tu’u saoloto outou e le Atua, e saoloto faamaoni outou (Ioane 8:36). O le sa’oloto faamaoni o lona uiga ua fa’asa’oloto oe mai aafiaga o le pologa. O lona uiga ua faafouina oe faapei e te le’i o’o muamua i se pologa. Ua faamanino ma le 2 Korinito 5:17; o le taimi e te i ai iā Keriso o oe o se tagata fou. O ou fa’amaumauga tuai o le pologa i le agasala ma Satani ua soloiesea ma ua fa’afouina mea uma.

O lenei, o le Iupeli, e lē gata o le fa’asa’olotoga mai le pologa, o le isi ona uiga, o le toe fa’afo’isia o mea uma na avea fa’amalosi pe ave tatau. I le faitauga mai le Tusi Paia o le asō, na fetalai le Atua afai ua mativa se uso ma ia fa’atauina atu ana meatotino ma ua lē mafai e ia ona toe maua mai ana mea, e sa’oloto le uso, e toe fo’i atu i ana mea i le tausaga o le Iupeli, auā o le Iupeli o le taimi fo’i lea o le toefuataina. Ou te folafola atu i le suafa e sili i suafa uma lava, o mea uma ua faoa ma oe pe ua e foai atu e aunoa ma le malamalama, e toe faafoi uma ia te oe. E maua ma e fiafia i le toe fuataina a le Atua i soo se vaega o e manaomia ai, I le suafa o Iesu, Amene.