Tuliese le lē faatuatua (Banish unbelief)

OPEN HEAVENS

MATALA LE LAGI MO LE ASO GAFUA 18 ME 2026

(tusia e Pastor EA Adeboye)

Manatu Autu: Tuliese le lē faatuatua (Banish unbelief)

Tauloto Tusi Paia: Mataio 21:21“A ‘ua tali atu Iesu, ‘ua fa‘apea atu ‘iā te i latou, “E moni, ‘ou te fai atu ‘iā te ‘outou, ‘Āfai ‘ua ‘iā te ‘outou le fa‘atuatua, ma ‘outou lē māsalosalo, ‘ona faia lea e ‘outou e lē na o le mea ‘ua faia i le mati, ‘ae ‘āfai tou te fai atu i le mauga lenei, ‘‘Ia si‘itia oe, ma lafoina i le sami,’ ‘ona faia lava lea.”

Faitauga - Tusi Paia: Mataio 17:19-20

Fai mai le Eperu 4:12 o le Upu a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū. Fai mai foi le Ioane 11:3 na faia mea uma i le Upu a le Atua. E ui e malosi le mana i le Upu a le Atua, peitai a folafola pe faaaogaina e aunoa ma le faatuatua, e le mafai ona maua se taunuuga. 

I le 1 Ioane 4:4 o loo tusia e sili o ia ‘ua ‘iā te ‘outou, i lē ‘ua i le lalolagi. O loo soifua le Atua i totonu ia te oe, ma e sili ma maualuga atu o ia i lo soo se faafitauli poo se luitau e togi atu i ou ala. O le mea moni lea i lou tulaga, e te maualuga atu i le mativa ma le faaumatia aua o le mana o le Atua o loo afio i totonu ia te oe, ma e mafai ona e faaaogaina e faatoilaloina soo se tulaga faaletonu i lou olaga. E ui i lea, o le lē faatuatua e mafai ona faalavelave i le mana o le Atua mai le tafe atu e ala i lana Upu i lou fofoga. 

E mafai ona avea oe o se kerisiano ae sauaina pea e le agaga o le masalosalo ma le lē faatuatua. O le tulaga e faia e lea agaga o le tuu i lalo o le Upu a le Atua i lou loto, ma faatupuina lagona e leai sa mana i le Upu a le Atua. E faatupuina foi ou manatu e lē moni le Upu a le Atua, e faatumuina lou loto i le lē mautonu. Afai o sauaina pea oe e le agaga o le masalosalo ma le lē faatuatua, ou te tatalo ia tuliesea ma oe i le taimi nei, i le suafa o Iesu. 

Na faatūina e Iesu le afafine o Iairo i le Mareko 5:35-43 i lana Upu. Ina ua ia taunuu atu i le fale o Iairo na ia faatonuina i latou o fetagisi i le maliu e ō i fafo ona faatonuina lea o le teine oti e tū i luga. Na faia foi e Peteru le faiga e tasi ina ua faaaogaina e le Atua o ia e faatuina Toreka mai le oti i le Galuega 9:36-42, na ia faatonuina i latou o fetagisi i le maliu e ō i fafo ona ia faatonuina lea o le tinā maliu e tū i luga. 

Le au pele e, e leai se tapulaa o le tulaga e mafai ona e ausia pe a e tautala i le Upu a le Atua i le faatuatua. E pei ona fetalai Iesu i le faitauga mai le Tusi Paia o le asō, e leai se mea e lē mafaia ia te oe, pe a e tautala i le upu a le Atua i le faatuatua e aunoa ma le masalosalo poo le lē faatuatua. E finagalo le Atua ia e faatuatua i lana Upu ma savali ai. E finagalo e te alu i tulaga ua leai se faamoemoe ina ia mafai ona ia faaali atu i le lalolagi o loo iai pea le faamoemoe e tauala atu ia te oe. E finagalo e na te faaaogaina oe ma le matautia ma susulu atu ai lona malamalama ia te oe ina ia viia ai pea o ia (Mataio 5:16). Peitai e tatau ona aoaoina oe e faatuatua i lana Upu ma le atoatoa, ia folafola lana Upu ma le mana ma le toa i soo se tulaga o feagai ma oe. Tau ina ia avea oe ma auala e faaali atu ai le mana matautia o le Atua i soo se mea e te alu iai, i le suafa o Iesu, Amene.