Pe a fetalai le Atua (When God speaks)

OPEN HEAVENS

MATALA LE LAGI MO LE ASO LUA 19 ME 2026

(tusia e Pastor EA Adeboye)

Manatu Autu: Pe a fetalai le Atua (When God speaks)

Tauloto Tusi Paia: Kenese 1:3 “‘Ua fetalai mai le Atua, “‘Ia malamalama;” ‘ona malamalama ai lea.”

Faitauga - Tusi Paia: Salamo 29:1-11

I le tauloto o le asō, na fetalai le Atua, ‘Ia malamalama’ ona malamalama ai lea. Ina ua ia faatonuina le malamalama ia tino mai, na ia folafola atu ia mou ese le pogisa, ia suia le faanoanoa i le olioli, o le tumau i le tulaga e tasi ia siitia le tulaga. O le Upu a le Atua e suia olaga o tagata ma soo se tulaga. A oo mai lana Upu i se tagata, o lena tagata o le a oo i se tulaga e feliuaina ai soo se vaega o lona olaga. 

Fai mai le Salamo 29:4, o le siufofoga o le Atua e malosi ma e tumu i le mamalu. O soo se taimi e fetalai ai le Atua, o soo se mea e iai le ola i le lagi ma le lalolagi, e gatete e faia lona finagalo. O lea la ua tatou iloa le malosi o le siufofoga o le Atua, e tatau ona tatou faaeteete i ana fetalaiga e faatatau iai tatou. E tatau ona faaeteete ina ia faamautinoa e na te lē folafolaina se mea lē lelei iai tatou aua e taunuu lava. E tatau foi ona tatou faamautinoa e na te folafola faamanuiaga i o tatou luga auā afai na te faia, e lē mafai ona toe suia. 

E mafai ona e faapea mai, ‘e faapefea ona fetalai le Atua ini faamanuiaga ia te a’u e lē mafai ona toe suia?’ I le Kenese 27:1-4, na naunau Isaako e faamanuia ia Esau, ae o le faatulagaina o ia e maua lea faamanuiaga, na fai ia Esau, e ave ana auupega ma tuli mai se manu. Na ia faatonu Esau e kukaina i le auala e masani ona fiafia iai, a maea ona ai ona ia faamanuia lea ia te ia. Peitai, na taufaasese Iakopo i lona tamā o ia o Esau, ma ia maua ai le faamanuiaga na fuafuaina mo Esau. Mulimuli ane ina ua iloa e Isaako ua sese le tuuina atu o faamanuiaga ia Iakopo, ae ua lē mafai ona ia toe suia (Kenese 27:33). Fai mai le Eperu 12:17 e ui i le matuā faatoga atu ma loimata o Esau, na lē mafai ona toe feliuaina le faamanuiaga ua maua e Iakopo. 

Na manao Isaako e auauna ma faafiafua Esau ia te ia ina ia faamanuia ia te ia. E faapena foi pe a e manao e faamanuia le Atua ia te oe. O tagata e auauna i le Atua ma o latou loto atoa ma faafiafia ia te ia i latou manatu, upu ma galuega, e latou te maua lava faamanuiaga. E lē mafai e se tagata ona faia pea mea e inoino iai lona tamā ae manatu e faamanuia iai lona tamā. E lē faapea e faifaipea le lē usitai i faatonuga ma fai mea e lē fiafia iai le tamā ae manatu o le a fiafia iai lona tamā. 

Le au pele e, e ono fiafia le Atua i lou olaga? E te inoino i le agasala ma tamoe ese ma mea e inoino iai le Atua? E te usitai vave ma le gauai i ana faatonuga? Afai o lau tali i fesili uma nei o le ‘Ioe’, o le a faifaipea ona ia folafola faamanuiaga i ou luga. E na te folafola pea faamanuiaga i luga o lana fanau e faamalie ia te ia. 

Tatalo

Tamā, faamolemole fesoasoani mai ia te a’u ia ou ola i se olaga e faamalie ia te oe i taimi uma ina ia ou agavaa ai e maua faamanuiaga e lē mafai ona feliuaina i le suafa o Iesu, Amene.