Soifua maloloina lelei mai le Atua (Divine health)

OPEN HEAVENS

MATALA LE LAGI MO LE ASO LULU 20 ME 2026

(tusia e Pastor EA Adeboye)

Manatu Autu: Soifua maloloina lelei mai le Atua (Divine health)

Tauloto Tusi Paia: 3 Ioane 2 “Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.”

Faitauga - Tusi Paia: Isaia 55:10-11

Fai mai le Salamo 105:37 ina ua tuua e tagata Isaraelu le nuu o Aikupito, e aunoa ma se tasi sa vaivai, o lona uiga o tagata uma sa soifua maloloina lelei ma malolosi. O i latou sa tigaina i le pule a o latou taitai, ua faafuasei ona malolosi ma soifua maloloina lelei ina ua maea ona aai i le tausamiga o le Paseka ma ua sauni e tuua Aikupito. Afai na faamaloloina e le Atua tagata sa le aunoa ona sasa ma faapologaina ma tusiesea, o latou vae foi e lei fulafula mo le 40 tausaga ao i ai i le vao matua (Teuteronome 8:4). E mafai foi ona tuuina atu e le Atua le soifua maloloina lelei ia te oe. 

Tusa poo le a lava le umi ma  le faigata o se ma’i e feagai ma se tagata, e mafai ona faamaloloina e le Atua atoatoa. I le Ioane 5:5-9, na o le tasi lava le upu na fetalai ai Iesu i le tamaloa sa ma’i mo le 38 tausaga ae malolo. O loo taua mai i le Salamo 107:20, a auina mai e le Atua lana Upu, e mulimuli mai ai le malologa ma le solotoga.

 O ma’i ma faama’i, e le mafai ona tutū i le malosi o le Afioga a le Atua. A auina mai e le Atua lana Upu, e le toe foi fua ia te ia ae faia le mea e finagalo e faia. I le faitauga mai le Tusi Paia o le asō o loo tau mai ai ia i tatou, o le timu ma le kiona mai le lagi, e faasūsūina ai le laueleele ma fua mai ai ni fua. O le Upu a le Atua e manuia foi i le mea o lo’o auina atu iai.

Ua na o se upu na fetalai ai Iesu, na lava lea e malolo ai le atalii o se alii mau tofi i le Ioane 4:46-54. Na fetalai Iesu i le upu ao iai i Kana i Kalilaia ona malolo lea o le tamaitiiti sa mamao le nofoaga na iai i Kapanaumi. O Afioga a le Atua e le mafai ona taofia e le taimi, poo le vanimonimo pe faatuai foi ona o le mamao. I le Mataio 8:5-13 pau lava le mea na manaomia e faamalolo ai le auauna a le taitai o le toaselau, o se fetalaiga a Iesu. O le tama teine foi a le fafine Suria Foinie sa matua vaavaai ma talitonu i le matautia o le faamalologa ina ua fetalai le Atua i lana Upu i luga o se faafitauli o tulai mai ia te ia (Mareko 7: 24-30). O le upu a le Atua e laugaina e ana auauna, ma talitonu iai ma le faatuatua, e oo atu ai le malologa i e mama’i. E mafai foi i lana Upu e pei ona tusia i le Tusi Paia ona faamalolo soo se tasi pe a fai e faatuatua ma talitonu iai. 

Le au pelē, afai o i ai se gasegase i lou tino, ua maea saunia e le Upu a le Atua lou faamalologa, pau lava le mea e te faia, o le talitonu iai. I tua atu o le talitonu i le Atua mo le faamalologa, o lona finagalo ia e ola i le soifua maloloina lelei mai ia te ia, e pei o loo faamautūina e le aposetolo o Ioane i le tauloto o le asō. O le faamanatu, e pau lau matafaioi o le talitonu i lana Upu. Ou te tatalo ina ia aua nei maua oe, i ni gasegase e amata atu nei, I le Suafa o Iesu, AMENE.