Ia e mauoa i galuega lelei (Be rich in good works)

OPEN HEAVENS

MATALA LE LAGI MO LE ASO GAFUA 15 IUNI 2026

(tusia e Pastor EA Adeboye)

Manatu Autu: Ia e mauoa i galuega lelei (Be rich in good works)

Tauloto Tusi Paia: Efeso 2:10 “Auā o lana lava galuega i tatou, na faia i tatou ‘iā Keriso Iesu, ‘ina ‘ia faia galuega lelei, na saunia anamua e le Atua, ‘ina ‘ia tatou sāvavali ai.”

Faitauga - Tusi Paia: 1 Timoteo 6:17-19

Sa ou nofo i se tasi aso i le fale o se tagata mauoa ma sa ia valaaulia a’u i le meaai o le taeao. Ina ua ou oo atu i le laulau ai, o le tele ia o meaai eseese ua ofo mai ia te a’u. Ua matuā tele ipu meaai eseese ua ou ofo tele ai, ma ua amata ona ou momoo i meaai faigofie ou te masani ai i lo’u fale. 

Le au pele e, ua sili atu ma le 80 tausaga o ou ola i lenei lalolagi, ma ua ou iloa, e faigofie lava mea e manaomia e fiafia ai le tagata i lenei olaga. E lelei le mauoa, peitai a ave e tagata le faamuamua i le oa latou te maua, e oo i mea masani i latou olaga ua faafaigata, e vave ona fememeai ai le mafaufau. 

I le faitauga mai le Tusi Paia o le asō, na faamalosi Paulo ia Timoteo ia matua fai atu i ē mauoa i le ekalesia e aua le faamaualuluga ae ia mauoa i galuega lelei. E lē avatua e le Atua le oa e faalialia vale ai. E na te faamanuia i tagata i le oloa ma le tamaoaiga ina ia avea i latou o ni tagata tausi mealelei i ana punaoa. O soo se tagata e uu mau i mea ua foai iai e le Atua e na te lē maua le fiafia aua e sili atu le manuia o lē na te foai i lo lē na te talia (Galuega 20:35). E finagalo le Atua i lana fanau e mauoa i galuega lelei. E finagalo ia latou pei o fafine i le Luka 8:2-3 na latou faaaogaina a latou oa e lagolago ai i le galuega a Iesu ma faalautele lana galuega talai ao iai i le lalolagi. O faamanuiaga ua foai atu e le Atua ia te oe e tatau ona faaaogaina e faamanuia ai i isi tagata. 

Tusa poo le a le telē o lou fale, e lē mafai ona e moe i potu uma i le taimi e tasi. Tusa poo le ā lou mauoa, e valea le fufulu o ou lima i le suauu i lo le vai aua e oo atu ai faafitauli ia te oe. E faigofie le olaga, e lē tatau ona faafaigatāina i le taumafai e faalialia le mauoa. E toatele tagata ua oo i le fememeai o le mafaufau aua ua latou faatagaina le oloa e tele e taitai ese i latou mai le faigofie o le olaga. 

Le au pele e, e pau le auala e faamanuia ai oe i le maua o oloa e tele ma maua ai lou fiafia ma le olioli, pe afai e te mauoa i galuega lelei e pei o le fafaga o e matitiva, lagolago i misionare ao o atu e talai le talalelei, galueaina Ekalesia ma faalautele le malo o le Atua i soo se auala. O lona uiga, e sili atu le faaalu o au tupe i le faalauteleina o le malo o le Atua i le lalolagi i lo le faatauina o mea e pito sili ona taugata. O e mauoa ea i galuega lelei mo le Atua? I le suafa o Iesu, Amene.