Mata e vaai ai 3 (Seeing eyes 3)

OPEN HEAVENS

MATALA LE LAGI MO LE ASO SA 28 IUNI 2026

(tusia e Pastor EA Adeboye)

Manatu Autu: Mata e vaai ai 3 (Seeing eyes 3)

Tauloto Tusi Paia: Efeso 1:18  “Ia fa‘apupulaina mata o ‘outou loto, ‘ina ‘ia ‘outou iloa le uiga o le fa‘amoemoe ‘ua i lona vala‘au mai, ma le uiga o le faulaigamea lelei o i lana tofiga ‘ua silisili mo le ‘au pa‘ia.”

Faitauga - Tusi Paia: 2 Tupu 6:8-23

I le faitauga mai le Tusi Paia o le asō, o Elisaia sa i Isaraelu ae na te iloa ma lagonaina fuafuaga uma a le tupu o Suria o loo faia i lona potu moe. O le mea na tupu, na lē manuia uma fuafuaga a le tupu o Suria e faasagatau atu ia Isaraelu. Na lē fiafia ai le tupu o Suria, o lea na ia auina atu se autau e saisai mai le perofeta. E na te lei manatu lava pe iai se malosiaga faaleagaga i tua atu o le iloa mai Isaraelu o fuafuaga o loo faia i le potumoe o le tupu o Suria. Ina ua iloa atu e le auauna a Elisaia le au a fitafita a le tupu na auina atu e saisai mai Elisaia, sa fememeai ma ua tamoe ia Elisaia, ua luluina i le fefe. Na ia iloa atu na o fitafita a le au a Suria ua siomia le fale o Elisaia peitai e na te leiloa atu solofanua ma kariota afi ma au o le lagi o loo siomia i latou. Ina ia to’a lelei lana auauna, na tatalo Elia, “Le ALI‘I e, ‘ia e fa‘apupula i ona mata ‘ina ‘ia ona iloa.” (2 Tupu 6:17). Ou te iloa na vave ona mou lona fefe ina ua ia vaai atu i au malosi o le lagi o loo siomia i latou. 

Le au pele e, o mea e te vaai ma iloa atu e fua iai lou tali atu i se tulaga. Afai e pau mea e te vaai atu iai o mea i le tino nei, o le a e fefe pe a feagai ma luitau, e pei o le auauna a Elisaia. O le a e ola pea i le fefe seiloga e faapupulaina ou mata faaleagaga ma iloa ua saunia e le Atua le laoai mo oe i luma o ē ita  mai ia te oe ( Salamo 23:5). E le tatau ona e fefe aua e sili atu o ia ua ia te i tatou nai lo o ia o loo i le lalolagi (1 Ioane 4:4). Aua e te tetemū i luma o lē e tatau ona fefe pe a vaai ia te oe. Fai mai le 1 Peteru 5:8 e fealualuai o ia e pei o se leona tagi e saili se e aina e ia (1 Peteru 5:8). E masani lava ona sue ma osofai e leona manu e vaivai atu iai latou, o lona uiga, afai o oe e te vaivai, e ono faaosofia le tiapolo e osofai ia te oe. Peitai afai e te malamalama i le mana o Lē o loo afio i totonu ia te oe, e sola ese le tiapolo ma oe.  

Afafine ma le atalii o le Atua, o e vaai atu ia te oe ua e malosi e fetaiai ma soo se faafitauli, pe e te fememeai pe a feagai ma luitau? Ou te tatalo ia faapupulaina ou mata e amata atu nei, ina ia e iloa le mana o loo faatasi ma oe ona o lou tulaga o fanau a le Atua ma aua e te toe fefe ini luitau e oo mai ia te oe. A e maua mata e vaai ai, e te lē toe fefe ini luitau e oo mai i ou ala, i le suafa o Iesu, Amene.