Faauuga e tafe (Permeating annointing)

OPEN HEAVENS

MATALA LE LAGI MO LE  FARAILE 18 SETEMA 2026

(tusia e Pastor EA Adeboye)

Manatu Autu: Faauuga e tafe  (Permeating annointing) 

Tauloto Tusi Paia: Salamo 138:8 “E fa‘ataunu‘uina e le ALI‘I o mea uma mo a‘u; le ALI‘I e, e o‘o i le fa‘avavau lou alofa; ‘aua ‘e te tu‘ulafoa‘iina le galuega a ou ‘a‘ao.”

Faitauga - Tusi Paia: 2 Tupu 13:21

I le Mareko 8:22-25, na feanu Iesu i mata o se tauaso, faaee iai ona aao ma fesili pe iloa atu se mea. Na tilotilo i luga le tauaso ma fai mai ua vaai atu i tagata e pei ni laau o savavali. O nisi e ono malilie i lenei vavega, ua pupula le tauaso. Peitai, na pa’i faalua Iesu i le tauaso ona ia iloa lelei atu lea o mea uma. O se faataitaiga lelei lea o se faauuga e tafe atu mai se tagata faauuina. 

O Elisaia o se tasi tagata na matua faatumulia soo se itu o lona olaga i le faauuga, e oo i ona ivi ua mamago, na faatuina ai tagata ua oti, e ui ua leva na maliu Elisaia. Ua ou vaai i ni tagata faauuina ua latou atinaeina le galuega a le Atua ua ola lauusiusi, ae a e vaai totoa i latou olaga, e te iloa ai, o nisi vaega o latou olaga e lē o iai se ola. E lē tatau ona faapea. 

Le au pele e, a faauuina oe e le Atua i se vaega se tasi o lou olaga, ae e vaai atu i seisi vaega o lou olaga e lē ola lelei i le tulaga e tatau ona iai, faamolemole ole atu i le Atua mo le faauuga e tafe atu i vaega uma o lou olaga. Aua nei gata lou malie i le faauuga i se vaega se tasi o lou olaga, saili le faauuga a le Atua e tafe ma susulu atu i vaega uma o lou olaga. 

I tausaga e tele ua mavae, na valaaulia au e se tamaloa i lona fale i Houston Texas i Amerika. Ina ua ou alu ese ma lona fale, sa alu nofo i le nofoa na ou nofo ai ma tatalo. Ua mavae ni nai aso, ona ia maua lea o le vavega na ia ole atu ai i le Atua. Na ia faasoa atu i ana uo i le mea na tupu, ona o mai uma lea auauai ma nonofo i le nofoa lea na ou nofo ai ma tatalo. Ina ua latou maua uma vavega, ua logotala ai nisi ma ua faaopoopo pea tagata e asiasi i le fale o lea alii. Ua amata ona fiu le alii i le tumutumu atu o tagata o lea na ia alu ave le nofoa nanā i lona potu ae aumai seisi nofoa e sui ai ma le manatu, a lē toe tupu se vavega, o le a taofia ai le o mai o tagata. Peitai na faaauau pea ona o mai tagata ma maua a latou vavega. E leiloa e le tamaloa, e lei gata le faauuga i le nofoa, na oo atu i le fola o le fale na i luga le nofoa. 

Le au pele e, saili le faauuga a le Atua ma ole atu ia tafe lea faauuga i vaega uma o lou olaga, i le suafa o Iesu. 

Tatalo

Tamā, faamolemole ia tafe mai le faauuga mai ia te oe i vaega uma o lo’u olaga, i le suafa o Iesu, Amene.