EP12 𠢕人來做客 | 起造府城裡的全台語環境，做一齣上媠的「南渡」夢 ft. 南渡策室 x 無有為書店頭家--俊凱

全台語的開講環境佮讀冊會，佇往擺敢若是誠四常的代誌。

咱這粒島嶼往過的讀冊人是按怎咧講話？是啥物款屈勢？我相信是對重台灣本土語言意識的列位聽眾拚勢欲走揣的。雖然佇較早，甚至是將時的草地所在，使用台語根本都無蓋偌稀奇，是生活的一部份，但是受著語言斷層佮拗蠻政策搝搦的少年輩，假使猶未覺醒著台語對咱民族主體性來講是偌爾仔要緊，嘛無智覺著伊咧消亡是偌猛，這个語言恐驚仔佇20冬內就會欲死盪幌。

我相信用台語討論佮讀冊絕對毋是盡靠「屈勢」佮「媠氣」這款目的，按呢學來的台語只不個是咧臭煬、展𪁎的工具，伊應當愛起造咱維護「台灣獨有的形影」的信念，毋但共頂一沿智識份子古範的精神傳落來，感受著台語閣較豐沛的可能性，嘛會當感受著相放伴佮求進步的溫暖。

今仔日節目邀請著台南東區，全台語冊局「南渡策室 x 無有為書店」的頭家之一（另外一位郭頭家拄仔好無方便來~）俊凱先生！伊毋但是冊局的頭家，嘛拚死接案舉辦各種有關人文佮社會議題的展覽，佇能力允准的情形下共台語櫼入去遮的活動，逐家假使若一逝路來到府城，嘛歡迎去到𪜶店裡小坐小喋咧！

本集重點：

• 南渡策室 x 無有為書店是啥物款的空間？是按怎欲起造這个冊局？
• 我本人頭擺去到這間冊局，產生非常深的感觸
• 「台文歲」是啥物概念？是按怎愛佇語言復振運動內底重視「文字系統」？
• 對規劃到正式入厝捌搪著啥物困難無？咧佮業主參詳、妥協的過程中拄著「現實佮理想」的衝突，欲按怎佇內底櫼寡台語，予逐家看待的角度無相𫝛？
• 「某乜語言友善空間」表面上好聽，實際上是代表啥，來致使南渡策室起造「華語友善」空間？
• 頂逝大罷免同齊開票，做伙予珠淚滴，遮成做是互相鼓勵、開講佮安搭的環境
• 舉辦過上蓋樂暢佮上有成就感的活動是？
• 「南渡策室」四个字若像足有意義，𪜶分別代表啥物意境？
• 舉辦活動愛考慮著地方特殊的文化意義佮資產
• 未來這逝路的規劃，無論是冊局本身抑是家己本人