Lavi San Filtè Doesn't Give a Danm

"Lavi San Filtè Don’t Give a Danm” is the unapologetic, unfiltered space where real life meets real talk. In a world drowning in filters, pressure, noise, and digital madness, this show cuts straight through the nonsense. We break down the chaos of modern life — social media toxicity, scams, stress, survival, mental health, and the common sense of not giving a damn about things that drain your spirit. This isn’t self‑help. This isn’t preaching. This is clarity with attitude, culture with comedy, and truth with a Haitian backbone. A space to breathe, laugh, reflect, and reclaim your peace — one unfiltered conversation at a time.

In this episode of La Famille Pòt, Freya hides her report card after earning a C in Home Economics — the one class Ovila believes she should dominate, because Freya can cook real Haitian food with her eyes closed. When Ovila discovers the truth, she flies off the handle, convinced the school graded her daughter unfairly. Fueled by indignation and pride, Ovila makes a dramatic decision.

Transcript

SOUVNI: Salut les amis. Welcome nan emisyon Souvni on the Mike la. Mwen se Souvni, animatris emisyon an. Jodi a nou pral aprann anbrase yon kilti ki rele Sa Pa Gade M.

Pou di w laverite, kilti sa a se plis yon tandans sosyal olye de yon kilti. Sèjousi, nou gen anpil endiferans. Nou trè detache youn de lòt. Nou sanse devlope yon mantalite Kite Mele m. 

E bòn nouvèl la, sè ke, sa byen sèvi nou. Se yon tandans ke nou bezwen dekwa pou nou siviv. Dekwa pou nou adapte.

Mwen pa konnen si jenerasyon ki ap pase an, jenerasyon adilt yo, ki vle di nou menm. M pa konnen si jenerasyon sa a ap bourike nan travay yo toujou. Men jenerasyon ki ap vini an, Jenerasyon Z lan, Jenerasyon Milenè yo, Jenerasyon Alfa yo, pou sèten, yo trè opoze a travay di. E se pa yon kritik non. Se pa yon kritik ditou. Se yon obzèvasyon. 

E poukisa pou yo travay di? Yo pa bezwen sa! Yo fèt ak tout kiyè ajantri a nan bouch yo. Tout bagay pi fasil pou yo.

Lontan, nou menm, pou nou fè yon apèl telefòn, ou sonje? Se ti dwèt nou, nou te konn pran. Nou foure l nan wondèl telefòn nan, pou ap fè anpil mannigèt anvan nou fè yon apèl. Kounye a ou pa bezwen fè anyen. Se pale ak telefòn nan. Di l ki moun ou vle rele. Enpi, apèl la fèt. E sa se yon ti apèsi, yon ti entwodiksyon nan katafal chanjman, nan katafal pwogrè ke monn nan fè nan dènye 25 ane ki sot pase yo. 

Èske ou janm mande tèt ou? Kijan bagay yo va ye nan yon lòt 25 ane ankò?  Si nou se moun ki gen brenn, si nou se moun ki ap fè tèt nou travay, nou tou konnen ke nan yon lòt 25 ane ankò, lespri nou p ap menm kapab imajinen avansman ki pral fèt.

Lontan w te oblije fè tèt ou travay pou jwenn yon adrès. M pa konnen si nou sonje lè nou t ap fè yon wout long, nou te toujou gen tandans ale nan estasyon gazolin pou mande adrès, pou mande direksyon. Lontan se yon estasyon gazolin ou te bezwen, men kounye a nenpòt ti GPS ka mennen w nenpòt kote ou vle. Gratis ti cheri, san ou pa itilize brenn ou. E gen de machin, ou mèt fèmen je w, dòmi dòmi w, l ap mennen w kote w prale. L ap fè kafe pou l w reveye w lè w rive. Se jis kage tèt ou and enjoy the ride.

Lavi a ap chanje. Monn nan ap chanje. Trè rapid. Mwen dwe ajoute sa. Donk nou oblije chanje tou. 

Anpil chanjman.

Makèt kapab opere san kesye kounye a.

Labank kapab opere san yon gichè bankè kounye a. 

Gen anpil metye ki fin disparèt nèt. 

Elèv ki ap gradye nan kolèj kounye a, se asire w pou w pa al pran yon karyè ki p ap siviv chanjman rapid sa yo.

Kounye yon gran pati nan lavi nou ap fonksyonnen sou otomatizasyon sèlman.

M pa konn si w remake sa.

Nou vin detache de anpil emosyon imen ke nou te konte sou yo, pou nou kominike.

Mwen kapab fè yon konvèsayon byen long avèk emoji sèlman. San mwen pa di yon grenn mo.

E san m pa devwale sa ki nan kè mwen reyèlman vre.

Yon kilti Sa pa gade m. Yon tandans Kite mele m.

Se yon fason pou nou adapte a monn ki ap vini an. Yon monn kote lavi a modèn. Trè diferan ak monn ke nou te abitye avè l la. 

N ap salye mesye Valentin. Twòp pale. N ap salye Mesye Valentin ki ap antre kounye a. Bonswa Mesye Valentin! 

VALENTIN: Bonswa Souvni. Bonswa zanmi oditè. Èske m byen tande sa w di an, Souvni? Yon kilti Sa Pa Gade M?

SOUVNI: Wi, Valentin, pran l jan w tande l la wi. Se yon kilti, yon tandans sosyal ki ede nou adapte a chanjman jodi yo. Nou pral aprann kouman pou nou di, "Sa Pa Gade m!", "Kite Mele'm!", "M p ap okipew w!" Ki lòt fason ou di sa ankò?

VALENTIN: Ou gen dwa di, "Je m'en fous!", "Tanpi!" oubyen an bon Kreyòl, "Ak bò dèyè m w ap pale!"

SOUVNI: O! mwen renmen sa!!!

VALENTIN: Ki vle di jodiya nou pral aprann meprize moun?

SOUVNI: Non, se pa meprize. Mwen menm pèsonèlman, m panse ke lè ou sousye ou twòp, ou soufri anpil. Sitou sèjousi.

VALENTIN: A! sa, ou pa bezwen di m sa. Souvni! Mwen viv sa menm!

SOUVNI: Lè ou sousye w twòp, tout pwoblèm tonbe nan men ou. W ap eseye rezoud pwoblèm tout moun, enpi zafè pa w pa ka regle, paske ou pa gen tan pou tèt ou ankò. 

VALENTIN: Donk, esplike mwen egzakteman Souvni. Poukisa menm nou bezwen kilti 'je m'en fous' sa a? Ki relasyon sa genyen ak tan prezan ke n ap viv la? Esplike m sa kòm si mwen te yon ti moun piti. M bezwen konprann li.

SOUVNI: Valentin se pa yon bagay ke nou bezwen. Men se kòm yon vètman ke nou dwe mete sou nou. Se yon atitid ki sanse pran fil nan tan sa a.

VALENTIN: Men sa l ye menm?

SOUVNI: Se yon atitid 'sa pa ga de m' ke nou vin enkòpore, ke nou makònen nan chanjman sosyal lavi modèn nou kòm yon defans kont fatig pwofesyonèl. 

Se kòm yon defans kont mank datachman avèk kominote kote n ap viv la. 

Se kòm yon adaptasyon kont fason moun ap viv sèjousi. Moun trè egoyis sèjousi. Tout lajounen se fè foto tèt yo pou moun k a wè yo. Yo pa bezwen w ankò. Paske yo gen Tik Tòk. Yo gen Instagram. Yon gen fo zanmi nan Facebook.

E finalman se yon defans kont yon eksè denfòmasyon ki ap soti tout kote, nan YouTube, Facebook, Instagram, nouvèl ki nan medya a, espesyalman sou entènèt la, nan TikTòk, nan AI.... you name it.

VALENTIN: O mwen konprann. Anpil moun sispann sousye yo de pwochen parèy yo kounye a. Donk se yon fason pou triye e filtre tout lavalas enfòmasyon ke y ap pouse nan kalbas tèt ou. Donk, lè ou adopte yon tandans Sa pa Gade m, sa pwoteje lasante mantal ou.

SOUVNI: Egzakteman! Kounye lè w tande pawòl sa yo, ou ta panse ke n ap pwomote endiferans. Men se pa sa ditou. Genyen anpil pozitivite lè w adapte yon tandans konsa.  Menm jan ke genyen ti negatif ladan l tou.

VALENTIN: E pozitif lan se:

SOUVNI: If you don't care, 

1è: Ou kategorikman refize pou kite ti bagay dèyè manman, ti bagay mazèt. Ou pa kite sa okipe panse w, si w manfou.  Tout sa ki pa sou kontwòl ou lese sa tonbe.

2è: Priyotizasyon. Sa w ap fè a se li w ap okipe. Sa w ap regle a, se li w ap regle. Ou pa kite okenn lòt moun, ak lòt lide ki pa nan enterè w, fè w fè chemen detounen. Nan priyotizasyon, nenpòt bagay ekstra w al fè, ka fè w pèdi tan. Tan ke ou pa genyen pou pèdi.

3è: If you don't care, si ou manfou, ou vin gen yon sètitid. Ou vin gen yon konfyans nan tèt ou. Si w vire bouda w bay tout moun lè y ap fòse opinyon yo sou ou, kounye ou pa pè sa y ap di de ou ankò. Ou pa kite okenn moun ba w presyon. Ou vin gen plis chans pou fè bagay ki fè tèt ou plezi.

VALENTIN: E nan aspè negatif la?

SOUVNI: Nan aspè negatif la,

1è: Natirèlman, si ou pa sousye ou, sa pa vle di pou w vin akaryat. Si ou pa sousye w, ou gen dwa atenn yon angoudisman emosyonèl. Pa gen anyen ki vin di w anyen. Donk sa pa bon. 

2è: Oubyen, ou gendwa vin gen anpil endiferans. Paske ou pa care. Paske ou manfou. Donk moun ki asosye avèk ou kapab panse ke ou vin endiferan. Sa pa bon.

3è: Nan aspè negatif lan, si w ap viv yon mantalite 'Sa pa gade m,' 'kite mele m', sa ka koze ou fè neglijans nan bagay ki enpòtan.

VALENTIN: Donk nou pa ta renmen ou rive nan tandans negatif sa yo. Men nou ta renmen ke ou sispann sousye w de bagay ki pa gen valè, paske sa konble lespri w. Enpi ou vin pa gen plas nan tèt ou pou anyen ankò!

SOUVNI: Wi, sispann sousye w de bagay ki pa gen valè — men chwazi yon priyorite nan lavi w, enpi pa detounen de li.

VALENTIN: Sa a bon. Sispann bay tèt ou traka pou sa moun ap di — men koute konsyans ou ki toujou di w laverite.

SOUVNI: Sispann pase nwit blanch ap panse a pwoblèm moun — men ou gen dwa mete pwoblèm pa w de kote lè w bezwen dòmi. Enpi lè w leve ou va byen repoze pou ka rechèche regle pwoblèm pa w.

VALENTIN: Sispann kouri dèyè validasyon — men, kouri dèyè lapè w pito. Fè lapè ak tèt ou. Aksepte moun ke ou ye a. Panse a tout bagay ke w akonpli nan lavi a. Panse a ki kote ou sòti. Gade kote w rive. Ou pa bezwen validasyon lòt moun. Ou pa bezwen moun bat bravo pou ou. Bat bravo pou tèt pa w.

SOUVNI: Sispann eseye fè tout moun kontan — It's impossible. Ou genyen yon sèl moun pou fè plezi. Se tèt pa w. Se twòp travay pou ap eseye plè tout moun.

VALENTIN: Sispann eksplike tèt ou bay moun ki pa vle konprann — men si yon moun ap chache konprann ou, pale avè l san w pa di twòp. Ou pa dwe okenn moun eksplikasyon. 

SOUVNI: Sispann viv pou kamera — manyè mete kamera a atè.  Lavi w a pase la. Anvan w bat je w, li gentan minui. Anvan w bat je w, li gen tan twò ta. Anvan w bat je w, time's up.

VALENTIN: Sispann fè konpetisyon ak tou moun — Chak moun gen wout yo. Suiv chemen pa w san ou pa konpare tèt ou ak tout lòt moun.

SOUVNI: Sa se yon mantalite M p ap okipe w. Sa pa gade m. Kite mele m.

SOUVNI: Nou retounen ankò zanmi. Ou branche sou emisyon Souvni on the Mike la. Mwen chita la avèk Valentin. Diskisyon nou jodiya se sou kilti Sa pa Gade m, kilti Kite mele m! ke anpil moun adopte alèkile pou ede yo adapte ak tout rafal enfòmasyon ki ap devide sou nou an tout moman. Sa ou di Valentin? Gen anpil mannigèt moun ap fè pou atire atansyon nou alèkile.

VALENTIN: A! sa se sèten. E yo genyen plizyè pòtal pou yo pase pou fè sa.

SOUVNI: Men wi. Si yo pa jwenn ou nan telefòn, y ap pousuiv ou nan tèks. Si yo pa jwenn ou nan tèks, y ap chache w nan imèl. 

VALENTIN: Chak ti pawòl, chak ekran, chak foto, chak pòs yo mete sou Instagram, chak videyo YouTube ki lage atè, se pou atire atansyon w. 

SOUVNI: Nou gen kapasite mantal pou n sousye nou de pwoblèm pa nou sèlman, san distraksyon pa mete pye. San nou pa detounen nou menm.

VALENTIN: Men, lemoman ou kòmanse ap sousye w de pwoblèm lòt moun, ou vin ap depanse plis enèji pase sa ou genyen. 

SOUVNI: Wi, ou kapab bay yon moun yon ti tan. Montre li ke ou la avèk li. Ba li yon ti sousi lè l gen pwoblèm. Yon ti ankourajman. Men imedyatman apre, retounen nan pwoblèm pa w. Retounen nan laswenyay tèt ou. Ou gen ase sou do w. Ou pa bezwen tèt chaje. Tèt chaje se pwoblèm. Tèt chaje se maladi. E depi maladi mete pye, ou tou konnen ou pral depanse lajan. Donk gen de tèt chaje ki pa vo lapenn.

VALENTIN: Yon egzanp m ap bay, paske sa te pase mwen.

SOUVNI: o! o! Avètisman! Real life example coming.

VALENTIN: Ou gendwa gen yon zanmi w ki gen pwoblèm. L ap neye nan basen pwoblèm li. Men, le moman ke ou lonje men ba li. Li ka rale w antre nan lanmè pwoblèm nan avèk li.  Si w pa konn naje, pou w konn kijan pou w soti, ou ka nwaye. Ou fè fon tou, pou w pa janm leve ankò. Sa te manke pase m.

SOUVNI: Dabitid, kèlkeswa pwoblèm yon moun genyen. Kèlkelanswa jan moun nan santi l la, pa gen anyen ke ou menm, w ap janm kapab fè pou regle pwoblèm nan a san pou san. Donk, poukisa w ap pèdi nuit san dòmi, ap panse ak pwoblèm yon lòt moun? Poukisa w ap chaje tèt ou pou yon pwoblèm ke ou pa ka rezoud?

VALENTIN: An plizyè fwa yon moun ap fè fayit, tout sa w kapab fè se voye yon ti kòd pou l atrape sa, enpi ede l remonte. Si ou pa gen yon kòd pou voye pou moun nan, kite l tonbe. Ou va ede li leve apre.

SOUVNI: Paske si moun sa al tonbe, enpi w al nan pare so, ou ka tou tonbe atè a avèk li. Oubyen si w al layite kò atè a, pou moun nan pa pran gwo so, pou moun nan pa tonbe twò fò. Se sou ou menm moun nan va tonbe. Enpi, kimoun ki va soufri efè a?  

VALENTIN: Ou menm ki pral peye pou sa.

SOUVNI: You got it!!! Aprann di sa zanmi, "Sa pa gade m!"

SOUVNI: Valentin, ann pale serye. Se pa premye fwa mwen tande sa. Nan tan n ap viv kounye a espesyalman. Ou oblije pran yon pozisyon pou di 'Sa pa gade m" oubyen "I don't give a danm." E se yon chwa, se yon fraz ou dwe di chak jou dekwa pou mentni priyorite ou. 

VALENTIN: Ah wi Souvni! Gen moun ki gendwa pa di l men, anverite, yo fè aksyon an. Mwen konn moun ki konn deside koupe relasyon ak yon moun yo konnen, yo konn bloke yon moun nan telefòn yo. Yo konn bloke yon moun sou Facebook, sou Instagram, pou yo ka gen lapè. Pawòl la nan aksyon yo. Te m made w yon kesyon? Èske ou toujou sou Facebook, Souvni?

SOUVNI: Aktyèlman, non! Mwen te santi m pa t gen tan pou tout enfòmasyon ke moun ap mete nan Facebook. Se pa endiferans non. M panse gen anpil moun ki pataje bagay ki twò pèsonèl.  Si ou itilize Facebook pou biznis se byen, men otreman, kimoun ki gen tan pou sa?

VALENTIN: Ou fè yon desizyon pou bay tèt ou priyorite. Pou bay moun Facebook yo yon baboukèt kenbe. Paske ou gen bagay ki pi enpòtan pou fè.

SOUVNI: Egzakteman. Kilti “Sa pa gade m” nan pa vle di ou mechan. Li pa vle di ou endiferan. Sa pa vle di pou bay moun move jan. Li pa vle di ke ou pi enpòtan pase tout moun. Ni li pa vle di ou san kè tou. Ou senpleman, chwazi tèt ou. Chwazi fanmi ou. Chwazi priyorite w. Enpi bay tout rès moun yo bò bouda w.

VALENTIN:  Pa enkyete w pou opinyon lòt moun genyen de ou. Menm si ou te chanje fason ou abiye, fason ou pale, machin ou kondui, kay ou rete, laplipa ditan opinyon yo p ap chanje. Moun ap toujou panse sa yo vle panse.

SOUVNI: Pa chèche validasyon nan men moun. Espesyalman nan men moun ki sou entènèt la ke ou pa menm konnen.Pa pèdi tan ak resous ap chache 'likes', 'friends' oubyen 'views'. Yon koneksyon pèsonèl ak yon bon zanmi, sa pi enpòtan. Paske se zanmi sa a ki va la pou ou lè ou bezwen li.

VALENTIN: Pa pèdi tan ap konpare siksè lòt moun ak siksè pa w. Chak moun nan pwòp nivo pa yo. Chak moun nan pwòp chimen pa yo.

SOUVNI: Si yon moun mete yon bèl foto deyò nan yon rezo sosyal. Pa bliye, foto a plen filtè. Donk ou pa wè sityasyon moun nan nan kamera a. Menm si moun nan ap ri sa pa vle di ke li kontan. 

VALENTIN: Pa viv pou pèfòmans — Lè w ap gade yon moun sou Facebook, sou Instagram, TikTòk, YouTube, se yon wòl moun nan ap jwe. Men lavi yo ap pase dèyè sèn nan. Ou pa konnen ki kalite kalamite moun nan ap pase.

SOUVNI: Gen de kòmantè moun ap lage sou entènèt la se pwazon. Moun nan lage pwazon an enpi ou pran l san w pa konnen. Fè atanson bagay w ap ranmase sou rezo sosyal yo. Yo pa toujou reyèl

VALENTIN: Pa kite moun ou pa konnen sou entènèt la dikte lavi ou. Pa kite fo zanmi nan rezo sosyal yo dikte valè w — Lè ou kite moun ou pa konnen dikte valè ou, ou vin bliye kiyès ou ye.

Wi mèdam e mèsye, ou branche sou emisyon Souvni On The Mike. Sou Mikwo a, ou genyen animatris emisyon an, Souvni. N ape fè ti dyalòge avèk Mesye Valentin, yon zanmi nou ki pase nan estidyo an detanzantan pou patisipe nan diskisyon nou. Emisyon Souvni On The Mike la vin jwenn ou lakay ou chak vandredi soir at 7:30 PM sou Radyo Konpa, nan WLQY 1320 AM.

Si ou ta renmen kontakte nou, ou kapab ale nan sit wèb mwen, SOUVNI.ORG. Lè w ale nan sit lan, gade sou bò goch ekran an, w ap wè yon ti kare ble, ki make, poze kesyon ou la, ou kapab poze kesyon ou, mete imèl ou, epi soumèt li, w ap jwenn repons. Pi ba goch anba ekran an, si ou ta renmen telechaje emisyon an apre ke li fin pase, ou va wè yon lyen ki make Souvni On The Mike. Lè ou klike sou lyen sa a, ou va jwenn podcast Souvni on the Mike la kote emisyon yo va disponib pou telechaje si ou ta renmen tande yo ankò. 

Dakò zanmi, rete branche avèk nou toujou. La Famille Pòt ap vini talè konsa.

Kanè Kache a

La Famille Pòt

Epizòd 20

OVILA: Bon, Dyak, mwen pa konprann sa. Lekòl lage. Kounye tout timoun nan vakans. Mwen resevwa kanè Tika. Men m poko resevwa kanè Freya.

DYAK: Enben Ovila, sanble lekòl la voye kanè Freya a nan lapòs pou nou.

OVILA: Men kijan fè Tika ak Freya nan menm lekòl. Yo voye kanè Tika, men yo poste kanè Freya. Gen yon magouy la wi. Rele Freya pou mwen Dyak.

DYAK: Bon Ovila, ou chita la avèk mwen la. E ou vle pou m al rele timoun nan. Poukisa ou menm ou pa al rele l?

OVILA: Dyak, mwe konnen w byen. Jan m wè w sispèk lan la a, sanble ou konnen kote kanè lekòl Freya a ye! Freya! Freya! Kote w.

TIKA: Manmie, tu as appelé Freya? Elle est cachée dans sa chambre. 

OVILA: Sa Freya genyen li kache la. Se moun ki antò ki kache.

TIKA: Le Carnet de Freya est disparu, se pou sa li kache? Papi te di Freya pou pa montre w kanè a manmie.

OVILA: Kisa menm? Se sa m santi! Dyak se pa konsa bagay la dwe fèt. W ap ankouraje Freya pou ban m manti la.

DYAK: Tika, mèsi dèske ou avili m konsa. M p ap janm di w sekrè m ankò. Ovila pa enkyete w. Lè Freya prè, l ap montre ou kanè a.

OVILA: O O! non. M pa dakò sa. Se fen de lane skolè. Kanè Freya pa ka disparèt tankou chodyè mwen yo lè gen fèt! Freya Freya!

FREYA: Mommy, you called me?

OVILA: Freya, kote kanè lekòl ou pou fen dane a?

FREYA: I don't know mommy.  Maybe the school is going green? They're going paperless? Eco‑friendly? Saving the trees?

OVILA: Sa w ap ban m la Freya? M konnen ke w te montre papa w kanè a. Al chache l ban mwen tanpri.

FREYA: Mommy, the schools don't use papers anymore, maybe they put the report cards online.

OVILA: Freya. Pa jwe avè m tande. Si w pa ban m kanè a, m pral enskri w nan summer school.

TIKA: Moi-même, mon carnet de notes est excellent.

OVILA: Mè wi. Gade Kanè Tika. Tout sijè se A, A+, A++. Si te gen A avèk 3 +, yo t ap ba ou li. Anglè se pa premye lang Tika, men li pi entelijan pase anpil lòt etidyan. Ban m kanè a Freya.

DYAK: A! Tika se pitit mwen. Li entelijan menm jan avè m. Tika ou se limyè kay la. Ou se flanm dife. Ou se yon folozòf. Ou se yon...

FREYA: Dad, just relax! It’s just a report card, not the Nobel Prize.

TIKA: Freya, la jalousie n'est pas bon pour ta peau. Sa pral fè w granmoun vit wi.

OVILA: Freya, dènye fwa m ap mande w wi. Ki kote kanè ou ye?

FREYA:  Okay okay! I hid it under my mattress, because I got a C, mommy.

OVILA: O O Freya, al pran kanè a pou m wè.  Si ou gen yon C, li pa mal. Ou pase kanmenm.

FREYA: Mommy, in America C means “average.”

DYAK: Nan mezon isit C sa a vle di Catastrophe wi.

TIKA: Freya, si tu as besoin d'aide, je peux te montrer. Mwen fè tutorat. C’est gratuit pou moun mwen renmen. Pou ou, mwen ka fè rabè.

FREYA:  Wow. Thanks but no thanks, Tika. I did not get a C in math o science. I got a C in cooking class 

OVILA: Kisa? Freya, se nan klas fè manje ou pran C a? Pitit Ayisyen mwen ki konn fè manje pase tout moun nan, pran C nan klas fè manje? Nan Home Economics class? Non, non, non, non!

DYAK: Ovila, kalme w. Se pou sa nou pa t vle montre w kanè. Mwen te konnen ou ta pral fè deblozay ak sa. Yon nòt C nan Home economics pa twò mal. 

OVILA: Dyak, w ap fin fè konplo ak pitit la kont mwen la a. Se ti Ayisyen l ye. Li konn fè manje pase tout moun lekòl la. Epi lè fini, li gen yon nòt C.  Fò m pale.

FREYA: Mommy, it's ok. It's not the end of the world. Se pa la fin du monde. M ka toujou reprann klas la. 

OVILA: O O! se la fin du monde menm wi! Mwen pral lekòl avè w la demen. Mwen pral fè w fè manje devan tout pwofesè w yo. Pou yo ka wè ke ou gen yon pi bon pwofesè lakay ou k ap aprann ou fè manje.

FREYA: Mommy, school's out. Lekòl fèmen. Tout pwofesè an vakans.

OVILA: Enben si se konsa, m pral frape pòt lakay pwofesè a. Pou w ka fè manje pou li, pou l wè ou ka fè manaje. M bezwen pou l chanke nòt la. 

DYAK: Ovila, se pa gran choz. Ti klas sa yo, se ti klas elektif yo ye. Ti moun nan si tèlman relaks nan klas sa yo, yo pa fè gwo efò. Yo pa fè travay pou yo fè. Si yo ba yo yon nòt C, se pa gran choz. Se pa anyen ditou. Sa p ap afekte lavni yo.

OVILA: Oke Dyak. Enben nòt sa pral afekte lavi Freya. Paske m pral pran mete yon aplikasyon nan lekòl la, pou m vin yon pwofesè lekòl la, pou m kapab montre elèv yo kijan pou yo fè bon jan manje Ayisyen!

FREYA: Oh mommy no!!!!!!

DYAK: Bon, men ni tou!

TIKA: Oh mon Dieu

END

Mezanmi o mesyedam, se tout sa nou t ap di. Mèsi anpil pou lekout. M espere n ap pale ankò lòt Vandredi. Se te Souvni on the Mike.  Pase bon wikenn