Ítalía heillar - hlaðvarp fyrir ferðalanga um Ítalíu
Ferðalög til Ítalíu og ferðatilboð þangað hafa aukist verulega á undanförnum árum. Hlaðvarpið ”Ítalía heillar” er tileinkað þér sem hefur nú þegar ferðast um landið eða hefur Ítalíu á óskalistanum.
Ég heiti Magga — ég er menntaður tónmenntakennari og upplýsingafræðingur. Í hlaðvarpinu ætla ég að deila fróðleiksmolum fyrir ferðalanga um Ítalíu, Ítali, ítalska menningu, borgir og bæi, eyjar, héruð, fegurðina, sérviskuna og ótalmargt fleira en líka litlu augnablikunum sem sjaldnar eru dregin fram.
Ítalía hefur verið hluti af lífi mínu í áratugi. Ég bjó þar fyrst sem skiptinemi, eignaðist fjölskyldu og vini fyrir lífstíð og leiðin hefur legið aftur og aftur til þessa fallega lands. Meðfram starfi mínu sem upplýsingafræðingur, varði ég mörgum sumarleyfum sem fararstjóri íslenskra ferðahópa á Ítalíu, þar sem nánast hver vegur, hvert stræti leiðir mann að einhverju ógleymanlegu.
Heimildir fyrir efni þáttanna eru fengnar víða. Ég vitna í eigin reynslu, reynslusögur annarra, leiðbeiningar virtra ferðafrömuða og margt fleira.
Njótið – ciao ciao.
Ítalía heillar - hlaðvarp fyrir ferðalanga um Ítalíu
1. Ítalía I - Ertu að skipuleggja ferð til Ítalíu?
Use Left/Right to seek, Home/End to jump to start or end. Hold shift to jump forward or backward.
Ítalía heillar – hlaðvarp fyrir ferðalanga um Ítalíu.
Í þessum fyrsta þætti Ítalía heillar segir Magga frá því hvernig áhugi hennar á Ítalíu kviknaði þegar hún fór sautján ára gömul sem skiptinemi til landsins. Hún deilir eigin reynslu með þér og gefur hagnýt ráð fyrir þig sem ert mögulega að skipuleggja Ítalíuferð.
Fjallað er um hvernig velja megi áfangastaði, kosti þess að ferðast utan mesta sumarhitans og hvers vegna „slow travel“ getur veitt þér meiri upplifun. Einnig er þér bent á að forðast akstur í stórborgum, varast ZTL-svæði og gefa þér tíma til að kynnast minni bæjum og héruðum.
Þú færð að heyra um fjölbreytileika Ítalíu, sögu hennar, tuttugu héruð, San Marínó og Vatíkanið, auk þess sem rætt er um ítalska matarmenningu, ást þjóðarinnar á fegurð, bella figura og la dolce vita.
******
ZTL – Zona a traffico limitato. Afmörkuð svæði í borgum og bæjum þar sem bílar þurfa sérstakt leyfi til að aka. Miðsvæðis.
Slow travel - Hæglætisferðamennska
Il bel paese – Hið fallega land
Una bella figura – Falleg ásýnd
La dolce vita – Hið ljúfa líf
Si puó fare – Þetta er hægt / Þetta er mögulegt
Umsjón: Margrét Gunnarsdóttir upplýsingafræðingur
Vefsíða: www.italiaheillar.is