當你覺得自己是脆弱的時候，是什麼令到你變得脆弱，同時有甚麼策略建立自己的反脆弱性？ KITWA播客室 EP.2《反脆弱》塔勒布

上一集我們講完塔勒布的「黑天鵝效應」，那這一集我們來說他另一本非常有名的書「反脆弱」。那這一集我地會講甚麼是脆弱，為什麼我們會變得脆弱，反脆弱的特點，以及反脆弱的策略，希望大家聽完之後，可以想到在自己的生活中，要如何建立自己的反脆弱性！

本集內容：
1.為什麼我們會變得脆弱？(火雞思維、現代的脆弱推手)  │  2.反脆弱是甚麼？( 凡殺不死我的，必使我更強大)  │  3.選擇權=不對稱性+理性  │  4.不對稱性：上檔利益>下檔損失  │  5.理性(反火雞思維、試誤法、目的論謬誤、槓鈴策略、林迪效應

一個來自澳門的90後的少年
試玩播客
目前主要分享讀書心得

Instagram: kitwaproduction
YouTube：kitwaproduction
Apple Podcast: KITWA播客室(廣東話)
Spotify: KITWA播客室(廣東話)

Transcript

Hello，呢到係Kitwa, 歡迎嚟到KITWA播客室，今日嘅節目係「Kitwa讀咩書」第二集。

 上一集，我地講左塔勒布既「黑天鵝效應」，認識左黑天鵝既一啲概念，第一個係負黑天鵝事件既影響，第二個係令自己曝露係正黑天鵝事件既策略「小賠求大賺」，仲有第三個，關於黑天鵝既四個認知偏誤。咁今日我地補完最後一個部分，就係點樣面對負面黑天鵝，佢既策略其實係圍繞我今日要講既呢本書「反脆弱」，咁事不延遲，我地就開始介紹呢本書。

係講反脆弱呢個概念之前，我想大家反思一下，點解現代人變得咁脆弱呢？

係呢到我想先分享一個火雞思維既故事。英國哲學家，伯特蘭·羅素，曾經提出過一個火雞思維，就係從前有一隻火雞，佢會覺得佢既主人對佢好好，完全冇要害佢既想法，因為主人每日定時比飼料火雞去食。於是一日一日咁樣過去左，火雞一直都會覺得自己係會咁樣生活落去。但直到感恩節，主人就再去冇餵火雞，而火雞結局，就係變成左一戶家庭既感恩節大餐。

事後我地睇會火雞好傻，點解會信佢既主人。但係如果要大家回想自己生活，有冇一啲地方係你會覺得理所當然，唔會相信佢會發生變化，或者係影響到自己既生活，就好似火雞咁。

其實係依加既社會，今時今日，我地受到各種各樣唔同既系統同制度保護，我地好顯然成為一個社會人，去同各種各樣唔同既系統合作，嚟支撐我地既生活。就例如人有食飯既需求咁，當我地唔想煮飯哥陣時，我地會打開個外賣app，係落左單之後，餐廳收到order，就有餐廳幫你安排餐點，再透過外賣平台安排人去送外賣，直到外賣到你手上，解決左你既用餐需求。又例如人有學習既需求，所以社會就安排左從幼稚園到高中，再到大學既課程，令到我地學習到一技之長可以係社會入面謀生。

呢個社會既運作機制越嚟越方便我地，想食飯唔洗自己煮，只要禁下電話就可以有人送個外賣到你屋企門口。而係學校學習可以令你省略自己探索既過程，係學校會教你一套知識之後，你成績達標之後，就可以搵一啲相對應既工作。

但係有冇諗過其實呢啲保護都有失效既一日呢，餐廳、外賣平台，可能會因為颱風水浸而冇開工。而係學校學番嚟既知識，有幾多係出嚟社會後係對人生好有幫助，係幫你取得成功既知識呢？

所以，我地時刻都要有一個概念，就係切勿做火雞。呢件事係十分之重要。即使目前既生活幾穩定都好，都唔代表未來既生活唔會出現問題。所以對生活既理所當然有警惕，亦都係你唔變得脆弱既開始。

咁火雞思維既缺點係咩呢，第一，我地知道佢係歸納過去經驗既思維，就好似會覺得以前都咁安全，將來都一定咁安全既。第二，就係火雞受到過份保護而令到佢咁脆弱，如果佢生活係大自然入面，係威脅變多既時候佢既警覺性都會變高，而唔會好似圈養咁警覺性變得咁低。

係現實入面，其實有啲嘢係過份保護我地，而令到我地咁脆弱。呢個係書中入面就叫做「脆弱推手」。脆弱推手會通過過度干預同控制，令到人或者系統變得脆弱。佢既特性係咩呢？第一個係佢會創造虛假既安全感，當人係虛假既安全感時候就會低估風險發生程度，而係真正既危機殺到埋身既時候，佢地好多時候會措手不及。第二就係佢會抑制自然波動，佢會透過減少意外風險既出現次數，令到系統變得穩定。

係現實入面，有好多脆弱推手係到，特別係令到我地覺得舒服，同時令到我地脆弱既嘢。舉一個例子，就例如學校，我地需要學習知識，所以我地需要一個場所去學習係社會生存既方法，於是學校就提供左一個標準化既學習歷程去評鑑每一個學生既水平，必須要學中文、英文、數學等主科。

學生需要用大量既時間去提高呢啲主科既分數，相對上比較少時間去探索自己既興趣，或者係搵一套屬於自己既係社會生存既方法。當學生從細到大都只係係學校入面爭取高分，而唔自己發展其他技能。出到社會之後，縱使學術能力好高，但生活上其他野就會令到佢變得脆弱，有可能係日常生活無辦法自理、都有可能係唔識處理人際關係。呢一啲忽略左外部環境衝擊既波動性，令到一個人覺得只要係學校努力讀書，將來就會好有前途，好安全，呢種諗法係會有佢脆弱既一面。

咁仲有啲例子係書入面例子都有講，例如「足球媽媽」，係香港會叫做「怪獸家長」、內地叫做「直升機父母」。好多時候父母好愛惜佢地既小朋友，同時因為太愛惜啦，所以會過份保護佢地既小朋友。但係過份保護小朋友既同時，其實都係剝奪左小朋友，佢自己面對困難既能力。因為有咩困難都好，父母都會幫佢地既小朋友解決，其實變相個小朋友變大左就唔識自己解決問題，大個左既小朋友係面對問題會變得脆弱，到最後搵番自己既父母解決問題。

咁我地用左一啲時間嚟講咩係脆弱，係想比大家感受一下脆弱係啲咩？同埋，係生活中，脆弱推手，一啲令我地忽略波動性既野，其實係令到我地變得脆弱既主要原因之一。

咁接住落嚟我地就開始講反脆弱係咩，同埋反脆弱既一啲概念。

首先，作者將人面對意外風險既狀態分左做三類。

第一個係脆弱，係面對壓力、波動或者意外既時候，容易有損壞，甚至解體。就好似一個玻璃球，一旦跌左落地下就會碎曬。

第二個係強固，係面對壓力、波動或者意外時能夠保持不變，但係唔會因此變得更好。就好似一個用鐵既球咁樣，即然跌左落地下，佢既結構大概上都完整。

第三個係反脆弱，係面對壓力、波動或者意外時能夠變得更強大。就好似一個彈力球咁樣，跌落地下都好，因為有彈性同韌性，佢都可以恢復原狀。

咁反脆弱性有幾個特點，第一個係相對比脆弱同強固，反脆弱會中意錯誤同不確定性。第二個係反脆弱能夠從錯誤同不確定性當中獲益。簡單形容一下，就好似哲學家尼采講既一句說話：「凡殺不死我的，必使我更強大。」係經歷過歷練之後，生存落嚟既人同事物，通常佢就會有更多既成長。

其實好多既有機體都具有反脆弱性，都要透過犧牲自己一部分既脆弱去成就反脆弱。就好似一棵樹咁，即使佢係夏天，樹上生滿曬樹葉都好，係經歷秋冬季節，佢都要將所有，冇曬作用既枯葉啦全部甩曬出嚟，咁佢先可以捱過到呢個冬天，而直到春天佢又可以生番更多，更有用既樹葉出嚟。

又或者係一個人，佢係困難入面，培養出嚟解決問題既能力都具有反脆弱性，人一生入面有好多既危機同歷練，例如學業同工作既歷練、人際關係同親密關係既危機等等。係通過每一個歷練同危機之後，都會令你更強大，係人生之後面對同一個危機時都可以處理得好，處理得更成熟。

人既免疫系統都有反脆弱性，因為免疫系統需要接觸病毒先會產生抗體。而抗體可以令到你抵禦相同既病毒。

但係面對危機時都有一個風險，就係個體能唔能夠存活，呢個好關鍵，因為個體唔能夠存活渡過危機既話，一切都會冇意義。就好似一棵樹需要渡過寒冬生存落嚟，人唔可以一直面對長期既惡性壓力。免疫系統都唔可以直接面對致命既病毒。

接著落嚟，點解反脆弱性係會鍾意錯誤同不確定性，同時會係錯誤同不確定性入面受益？其實係因為佢有選擇權，當你有選擇權既時候，你可以係簡對自己有利既選項。同埋，事件既不確定性越高，選擇權越有價值。因為不確定性可能會帶嚟巨大收益，有選擇權代表住你有執行既權利。就好似當你要處理一件特別麻煩事情既時候，有選擇權，代表你有say no 既權利。遇到未來可能會有巨大收益既事，你有多餘既資源，或者能夠承受風險，都代表你有選擇權去投資做呢件事。

所以選擇權係機會，或者危機入面既價值，在於佢有選擇權，可以選擇避開風險，同時都可以選擇承受風險而獲得收益。係書入面就有一條公式詳細講選擇權係咩，就係「選擇權=不對稱性+理性」，啱啱我地簡單介紹完選擇權既概念，跟著落嚟就係拆解當中既內容。

第一，何謂不對稱性呢？意思係講風險，同埋收益之間既不平衡。呢種不平衡可以令人係面對不確定性同風險既時候會獲得收益。特別係風險同波動增加既時候會令你有更多既收益。

不對稱性有條公式，就係「上檔利益>下檔損失」，只要你認為哥一樣野，佢既損失有限，而係有更多機會同不確定性既情況下，佢既收益會無上限咁增加，咁就係「上檔利益>下檔損失」，簡單嚟講係損失有限，收益無限。就好似我越早讀完反脆弱呢本書，花啲時間了解呢本書既所有觀點，我就可以越快去建立自己既反脆弱性，之後可以更輕鬆、更縱容面對人生既難關同挑戰。題外話就係呢本書雖然好厚，但真係好值得每個人花時間去讀，同埋去實踐呢本書既觀點，一定對人生有幫助。

相反既例子就係「下檔損失>上檔利益」，例如一啲既高風險行業，佢地收益係有限，但要面對巨大既風險。例如建築工人，佢地能夠得到既收入，根據佢能夠做到幾多野，所以會有一個收入上限係到。同時佢地係工作既時候需要做足保護措施，因為佢地既工作環境有好大既風險，可能會出現生命危險。

所以係一啲發生負面風險比較多既領域，人就會顯得比較脆弱。而不對稱性既「上檔利益>下檔損失」，其實係提醒我地做決定時要比自己處係一個比較有利既位置。

生活係有好多唔同既方面，即使你有一方面係脆弱都好，都可以係另一方面有反脆弱性，去令到自己整體上冇咁脆弱。以一個青少年既認同感為例，可能佢係屋企方面都得唔到父母認同，令到自己覺得脆弱。但係佢可以係唔同既方面建立自己既認同感，例如佢好叻打籃球，可以係打籃球得到認同感。又或者佢有好多朋友，可以係朋友身上得到認同感。係生活上其他方面都可以有反脆弱性既話呢，即使自己有一部分係脆弱都好，但整體上具有反脆弱性，維持係「上檔利益>下檔損失」既狀態。

同樣既例子都可以應用到財務分配上，當你投資係一樣報酬好穩定既組合入面，你既收益都會好穩定，但佢唔會有指數級既變化。但如果你願意拎一部分錢去投資一啲高風險既組合，即使輸左都好，唔會對自己生活造成影響，但如果佢贏咗，佢既收益對比起穩定既組合會嚟得更多。呢個策略都就係我地等一陣會詳細講既「槓鈴策略」。

頭先我地講左選擇權公式既第一部分不對稱性啦，講緊我地係總體上要「上檔利益>下檔損失」，咁整體就會有反脆弱性，個體就能夠係不確定性入邊獲益。而公式既第二部分就係理性，做選擇既時候我地點樣去留底好既部分，同捨棄壞既部分。作者係大自然入面，同埋日常生活中發現到呢啲規律，呢啲規律係令到一個人，或者一件事件具有反脆弱性。

第一個係我地要具有反火雞思維，姐係一開始我地講既「切勿做火雞」，因為火雞佢本身歸納過去既經驗，會認為佢既主人每日都會餵野食比佢，而唔會諗到呢種生活會有變化，唔會認到佢會係感恩節既時候，成為左其他家庭既感恩節大餐。所以過去既安穩生活，唔代表將來都一定係穩定。

同樣地，我地唔可以跌入「沒有證明不等於證明沒有」既思維，咩意思呢，就好似黑天鵝既故事咁，當中世紀既人冇絕對證據證明黑色天鵝係唔存在，唔代表呢個世界係冇黑天鵝，只係人仲未有發現到黑天鵝。仲有更多既例子係風險同危機到，就好似死火山咁，雖然佢好耐都未有火山爆發既跡象，但都唔可以排除因為地殼活動，或者強烈地震，死火山就有可能會再次出現火山爆發。

第二個係試誤法，作者就講到啦，係大自然入面，錯誤既經驗會比起成功既經驗會更有反脆弱性。人知道自己錯啲乜嘢，係多過知道自己啱啲乜嘢。咁我需要乜嘢既錯誤呢？係「正確犯錯」呢本書入面既「智慧型失敗」就形容得好好。呢種失敗係令到我地進步，係一種「好既失敗」，係達到成功之前所需要既失敗。

例如你要搵到適合自己既學習讀書方式之前，要試過好多種唔同既，失敗既方法。又或者係學習一項新既技能，都要經過唔同既失敗，先會熟習，先會上手。

第三個係目的論謬誤。作者提醒我地一件事既結果，好多時都唔係我地做左啲乜，導致有咁既結果。而係有好多既隨機性影響着呢個結果。就好似一個成功人士，好多時候佢會將成功，歸功於自己用左啱既方法，但係可能當中有好多天時地利既因素影響，而令到佢取得成功，所以即使後人用左同一套方法，係唔同時間入面，都未必能夠複製同樣既成功。

除此之外，一件事情之所以會成功，都可能同你所做既野完全冇關係，書入面就舉左一個例子，就講到一個人佢去教一隻雀仔點樣飛，係雀仔學完之後，只雀仔識得自己飛，咁佢就將雀仔識得飛既結果，就歸功係自己教得好。就咁聽我地會覺得荒謬，因為雀仔識飛可能係雀仔既本能，同有冇人教，係完全冇關係。

但呢個例子就係提醒我地日常生活中既目的論謬誤，我地唔可以咁輕易，同簡化推論出一件事既因果關係。

第四個係槓鈴策略。佢係一種風險管理策略，係同時用極端保守同極端冒險兩種方法提高系統既反脆弱性。當係面對不確定性同風險既時候，呢種策略就可以平衡整體抗風險既穩定性同增長潛力。

係人身上都見到槓鈴策略既例子。當一個人過得太多穩定既、沉悶既日子之後，都會想去做唔同既活動，例如去旅行增廣見聞，又或者係從事有挑戰性既活動，去尋求刺激感。因為我地人除左需要安穩既生活，有安全需求外，仲有探索、成長同進步既需求，完成呢啲需求都係增加一個人既反脆弱性。

第五個就係林迪效應，意思係一件事，佢隨住時間既增長，佢既壽命反而會延長既現象。簡單嚟講就係，時間會驗證一樣野既對錯，對既會留低，錯就會被淘汰走。係文化層面呢個現象尤其明顯，例如代代相傳嘅神話同集俗，佢體到現一個文化既價值，同時都係一代代人傳承落嚟嘅集體經驗。

又或者喺經得起時間考驗嘅知識，簡單既例子係數目字一至十，係比人發明左之後，直到依加，都係比人用做計算必要工具。呢啲事物都有佢既反脆弱性，因為係時間洗禮之後，一啲唔穩定既、脆弱既野係唔會留底到落嚟，留得低落嚟既野都有佢既價值。

依到就講完選擇權=不對稱性+理性既部分，詳細咁講左反脆弱性當中既內容係啲咩，當然我覺得係需要一啲時間去理解，因為唔係每個人都經歷過脆弱。要體會「脆弱中成長」都唔係一件容易既事，因為人可能會係經歷危機後，會一沉不起。

但係我覺得，當你覺得自己係脆弱既時候，其實係提醒你要透過唔同既選擇，運用不對稱性，運用理性，慢慢建立番自己既反脆弱性，就好似一個人由一無所有，到建立自己既事業，自己既人生目標。

同埋，係經歷過風險既人係比其他人更能夠抵抗風險，同埋避開致命風險既能力，姐係好似之前我地講既，「要犧牲一部分脆弱，用來建立反脆弱性」。希望大家之後既生活，有能力既可以去經歷一啲可以承受既風險，去建立反脆弱性。

最後，對於我嚟講，「黑天鵝效應」同「反脆弱」都係幾重要既書，兩本書加埋都有一千三百頁，用左兩集，花左一啲時間去整，聽到呢到既大家，希望你有啲收獲。如果有建議既可以留個comment啦，下集應該唔整咁多複雜概念既書，咁我地下集再見，拜拜。