Boeke van die profete 12: Jesaja 1 - 12
Tobias: Hallo, julle almal! Lekker, lekker storietyd!
(Woef, woef, woef, woef)
Tannie: Hallo, Tobias! Is dit jou hondjie wat so blaf?
Tobias: Ja, Tannie, hy wag hier buite. Elke keer as hy my stem hoor, dan blaf hy!
Tannie: So, Tobias, ken jou hondjie jou stem?
Tobias: Ja, tannie Carin, baie goed!
Tannie: Dit laat my nou dink aan die storie wat ek vandag wil vertel. Onthou julle ons is besig met Jesaja? Vandag gesels ons oor hoofstukke een tot twaalf.
Tobias: Jesaja, ja! Het hy ‘n hondjie gehad?
Tannie: Nee, nee! Maar luister gou wat die Here deur die profeet gesê het: “’n Bees ken sy baas. Ja, en ‘n donkie weet presies waar sy baas vir hom kos gee. Maar julle Israel, ek is julle God, maar julle ken My nie.”
Tobias: O, aarde! As die baas praat, sê die bees “moo” en die donkie sê “hiha”, ‘hiha” maar Israel kon nie God se stem hoor nie? Moes die profeet met hulle raas?
Tannie: Die Here het deur Jesaja gesê hoe hy vir Israel en Juda gaan straf, maar ook dat daar hoop was. Hy wou hulle straf dat hulle kan terugkom na Hom toe.
Tobias: Tannie, nou hoe sou God hulle straf?
Tannie: Tobias, God sou die sterke Assiriërs stuur om hulle te straf. Jesaja het geskryf dat hulle soos klomp bye sou wees wat op Israel afkom. Assirië was daar waar Irak omtrent vandag is. En as ons gaan lees in Genenis 10, dan lyk dit of Nimrod die aartsvader was van al die Assiriërs. En Nimrod se oupa was Gam, een van Noag se seuns.
Tobias: Sjoe, Tannie, ons praat nou van baie lank gelede. Tannie, maar waaroor wou die Here vir Israel straf? Hoekom het hulle dan nie meer God se stem geken, soos my hondjie my stem ken nie?
Tannie: Tobias, die volk het nog offers gebring vir God en gebid, maar die Here het gesê: “Wat help dit julle bring offers, maar julle boelie die weeskinders en weduwees? Die regters - daar in die hof, hulle vat omkoopgeskenke, en dan word die stout mense nie gestraf nie. Julle sê vir wat verkeerd is, dis reg en vir wat reg is, dis verkeerd.”
Tobias: Oepsie! Wat nog, Tannie?
Tannie: Julle, hulle het ook afgode begin aanbid: afgode van goud en silwer en hout. Hulle het ook by dooie mense probeer raad vra en nie by God nie. Die Here was ook so hartseer omdat die vrouens van Juda so vol van hulleself, so hoogmoedig geword het.
Tobias: Tannie, het die vrouens van daai tyd ook mooi klere gedra?
Tannie: O ja, want Jesaja praat hier van allerhande mooi goed, soos ringe om hulle enkels, vingers, neuse en arms; oorbelle, voetkettinkies, mooi hoede en gordels en mantels en handsakke en spieëls en deftige rokkies en lekkerruik parfuum. Dit alles sou weggevat word as die Assiriërs kom. God het ook geraas omdat hulle mekaar se huise en grond gesteel het en liewer vir wyn en partytjies was as vir God.
(Woef, woef, woef)
Tobias: Jack, hou op met blaf! Aarde, Tannie, my hondjie is nou skoon moeg vir die lang lys! En ek!
Tannie: Ek ook, Tobias! Maar kom ek vertel julle van die hoop dat die volk sou terugkom na God toe. Onthou, God wou hulle straf sodat hulle kan terugkom na Hom toe. God het deur Jesaja gesê: “Kom gesels met My. Kom ons praat oor al die dinge wat julle verkeerd doen. Julle weet, al die dinge is soos skarlaken- rooi, en purper-pers vlekke wat op julle is. Julle kan dit nie skoonkry nie. Maar Ek, die Here kan julle weer wit was - so spierwit soos sneeu wat nou geval het. So spierwit soos skaapwol wat mooi gewas is - wit en sag.”
Tobias: Dis wonderlik!, Tannie!
Tannie: God het gesê Hy sal weer goeie leiers vir sy volk stuur. As mense terugkom na God toe, sal daar vrede op aarde kom. Jerusalem sal weer ‘n veilige, pragtige stad wees met groen bome. God sal vir Jesus en sy Heilige Gees stuur. Jesus sal die groot Koning wees, slim, sterk en soos ‘n goeie pappa vir almal wat na Hom toe kom. Hy sal nie onregverdig wees nie. Hy sal goeie raad gee vir almal wat vra.
Tobias: Tannie, het dit al gebeur?
Tannie: Tobias, van die dinge het al gebeur. Assirië het vir Israel weggevoer. Later is Juda ook weggevoer. Party van Juda het teruggekom na Jerusalem toe. Jesus het gekom en sy Heilige Gees gestuur. Maar party van die dinge wat Jesaja geskryf het, gaan nog gebeur, eendag as Jesus weer terugkom na die aarde toe.
Tobias: Jippie, jippie, jippie!
(Woef, woef, woef)
Tannie: Tobias, klink my jou hondjie is nou baie opgewonde!
Tobias: Ja, Tannie, hy hoor ek is so opgewonde! Jesus het gekom! Hy gaan weer kom! Hy is die groot Koning! Tannie, die Jesaja het sulke goeie nuus! Fantasties! Maats, dis die beste nuus in die hele wêreld! Gaan vertel vir iemand! Maar miskien moet ek nou maar groet en met Jack gaan speel, anders blaf hy die hele dag om! Ek groet julle! Totsiens!
(Woef, woef, woef!)
Tobias: Ek kom, Jack!
Tannie: Maats, die boek van Jesaja vertel van straf, want God wil hê mense moet terugkom na Hom toe. Jesaja is ook vol hoop. Ons is so bly oor al die profesië dat Jesus sou kom en dat Hy weer gaan kom! Daarmee groet ek dan ook tot volgende keer. Totsiens, maats!
***
