Á ég að hend'enni?
Halldóra Geirharðsdóttir og Steinunn Ólína hafa marga fjöruna sopið, stundum saman, stundum sundur. Nú í miðju lífsins er tiltekt innra jafnt sem ytra efst á baugi og því ætla þær að bera saman bækur sínar í orðsins fyllstu merkingu.
Þær ætla að byrja á því að gera rassíu í bókaskápunum. Skilja sauði frá höfrum, finna gersemar og handsama lygaþvælu og rusl.
Í hverjum þætti draga þær fram skruddur og meta hvort nauðsynlegt sé að eiga skræðuna áfram, hvort lærdómur hafi verið meðtekinn eða alls ekki.
Fer hún í öndvegi, í Hirðinn, eða er öruggast að brenna hana á báli?
Rannsóknarspurningin er: Eiga, eyða eða gefa?
Því einhvers staðar þarf tiltektin að byrja!
Á ég að hend'enni?
44. Breytum bulli í gull (Kría siglir um suðurhöf)
Ef við byggjum í landi þar sem bara er hægt að týna ávexti sér til matar sem nota á samdægurs því annars myndi allt skemmast þá yrði okkur aldrei kalt en þannig er það í Frönsku -Pólónesíu þar sem Halldóra dvaldi ásamt fjölskyldu sinni. Sjöl eru mesta þarfaþing á ferðalögum en í þessum þætti má læra um notagildi sjala í tískuinnslagi frá Dóru. Ýmislegt er rætt um gleraugu í þessum þætti en þó ekki miðaldragleraugu sem kemur á óvart þar sem Halldóra og Steinunn sigla hraðbyri inn í blindu elliáranna. Bókin Kría siglir um suðurhöf er i miklu uppáhaldi hjá þeim stöllum og þær velta fyrir sér nábýli hjóna þegar ekkert er nema himinn og haf og bátur sem ber þig eitthvert að því er virðist út í buskann. Steinunn hefur áhuga á umbreytingunni, t.d að breyta því sem erfitt er í eitthvað gott. Að breyta bulli og rugli í gull! Kannski eru þær báðar að gerast alkemistar án þess að fatta það?
Takk fyrir samstarfið: Íslandsbanki, Icelandair, Beautyklúbburinn