Fanney er 35 ára, markaðsstjóri með yfir

10 ára reynslu í uppbyggingu persónulegra vörumerkja og markaðssetningu á samfélagsmiðlum. Fanney hefur unnið með fjölda einstaklinga og fyrirtækja í markaðsstarfi ásamt því að hafa á tímabili unnið í sínum eigin rekstri tengt markaðsmálum og efnissköpun á samfélagsmiðlum.

Aðeins 18 ára gömul eignaðist hún sitt fyrsta barn og hefur frá unglingsaldri sinnt móðurhlutverkinu samhliða námi og starfi. Hún hefur lokið MS gráðu í markaðsfræði, MPA gráðu í opinberri stjórnsýslu og BA gráðu í stjórnmálafræði. Í dag er Fanney þriggja barna einstæð móðir og þekkir það vel af eigin raun hvernig það er að halda mörgum boltum á lofti í hinu daglega amstri.

Sara er 33 ára innanhúsarkitekt með BA-gráðu í innanhúsarkitektúr frá París. Áður en hún hóf feril sinn bjó hún í Frakklandi í fimm ár, þar sem hún sótti sér menntun og innblástur í alþjóðlegu umhverfi. Ferðalög hafa alltaf verið stór hluti af hennar lífi, og hefur hún haft þann heiður að ferðast vítt og breitt um heiminn og kynnast ólíkum menningarheimum.

Lífið hefur fært henni ýmsar áskoranir sem hafa mótað hana. Þær hafa kennt henni að meta það sem hún hefur, vera þakklát og lifa með fullum krafti. Í dag er hún í sambúð, barnlaus og starfar sem innanhúsarkitekt. Hún er ávallt opin fyrir nýjum verkefnum og áskorunum, hvort sem þær tengjast starfi, ferðalögum eða daglegu lífi.